Luka 5 - Ebaibuli

¹ Kosodi kanen nakeridakiniata ŋes ikodeta iirarete akirot naka Edeke, kebwoi ŋesi kariri kaŋolol naka Genesaret.

² Koany atakerin aarei nukeiaas oitolima loka aŋolol; konye kedokunito ikalokak ilosete iboyanakec.

³ Kodoka ataker adiopet, nakerai naka Simon, kilip ŋes aisukunyar nediokasilon anyoun koitolima, Kiboikin kisisianak ikodeta kojai ataker.

⁴ Nakedau einer, kotema ŋesi Simon atiar, “Koremo ataker kiton ataro, kocakakis iboyanakus aikamia lukecor.”

⁵ Koboŋok Simon kotema atiar, “Ejakait, kipou ketaaritos akuare kiya, komam kidumuni idiobore: konye kanuka akonikirot, acakakini bo iboyan.”

⁶ Kedaut aswam ŋun, kipokata iboro lukecor luipu noi: kokotosi ikeceboyan aŋed;

⁷ kokwetut lukaupakec lukejaas ataker ace aponare aiŋarakin kes. Kopotu, kisilelebata atakerin kere aarei kiton neebuciata alumor.

⁸ Konye keanyu Simon Petero ŋun, kibirokin kwap akuŋin nuka Yesu, kobala ebe, “Wu Ejakait, kinyeinai, naarai arai eoŋ ekadiakanaran.”

⁹ Naarai koumok ŋesi, ka ŋul kere lukejaas kaŋes, kanuka aipues naka lukecor lukikamunete:

¹⁰ koumokis da Yakob ka Yokana, odwe luka Sebedayo, lukemoranara ka Simon. Kotema Yesu Simon atiar, “Sirikikurianar; amear natikwana iraun ekalokan ituŋa.”

¹¹ Nakedauniata aitodokun atakerinikec oitolima, kinyeis kere, kotupasi ŋes.

¹² Kosodi kanen, nakejaar ore ediopet, kojai etuŋanan loelelebikina atapon: nakeanyunia ŋesi Yesu, kibirokin kwap ebuburia, kiŋaiŋa kotema atiar, “Ejakait, arai ikoto, ipedori aiswagar eoŋ.”

¹³ Korio Yesu akekan, kotiro ŋes, kotema atiar, “Akoto; kiswagar.” Atipet konyou atapon kamakeŋ.

¹⁴ Kicor ŋes sirikelimoki idiotuŋanan; konye ebe, “Kolot, kitodiar mama ejai esasedoti, koinak kanuka aiswagariokon kwape kolo kicorakinitor Musa, araun aitejenunet kamakec.”

¹⁵ Konye kiyatakinos akekiro aisiarar: kotukonokinos ikodeta luipu akiirar, ido aitaŋaleunio adekesiakec.

¹⁶ Konye ŋes kogitar kolot amodiŋ, kilip.

¹⁷ Kosodi kanen kapaaran adiopet kaŋun, isisianakini ŋesi: ido kiboiete Iparisayon ka ikesisianakinak luka ikisila kanen, lukepote koreria kere luko Galilaya ka Yudaya ka Yerusalem: kojai agogoŋ naka Ejakait kaŋes aitaŋaleun.

¹⁸ Ido koany, kibwokut ituŋa etuŋanan loesenyit koitada: kokotos aitolomar ŋes toma, ka aibwaikin akonyeneke,

¹⁹ Nakekurwosi aitolomar kanuka ekodet, kodokasi kuju oswi, kijoliliut ŋes aitorunio ametegulan koitadake kokidiŋ, akonyen nuka Yesu,

²⁰ Nakeanyunia ŋesi akeceiyuun kotema atiar, “Ijo ba, esionii akonidiakanareta.”

²¹ Kogeut ikewadikak ka Iparisayon epeget kobalas ebe, “Tŋai bo lo loinera nukainyanakin Edeke? Iŋai bo epedori aisioni adiakanareta, dimarai Edeke bon?”

²² Konye kojeni Yesu ekecepeget, koboŋok kotema kes atiar, “Kanukinyo ipegatatar kotauonokus?

²³ Ani bo naepatana, atemar ebe, ‘Esionii akonidiakanareta,’ arai bo atemar ebe, ‘Konyou kolot?’

²⁴ Konye tetere ijenunete ebe ejai Okoku loka etuŋanan apedor kakwap aisioni adiakanareta,” (kolimok lokasenyan ebe,) “Katemari jo atiar, Konyou, kibwok ekoniitada, kolot orekon.”

²⁵ Atipet konyou kakonyenekec, kibwok akeperit, kolot oreke, itopoloorit Edeke.

²⁶ Koumokis kere, kitopoloorito Edeke; kilelebunos akurian, kobalas ebe, “Kiany lolo nukaumokin.”

²⁷ Kokau kaŋun koloma, koany eketeleman esolo, ekekiror Lebi, iboie kaitelemis, kotema ŋes atiar, “Kotupunai.”

²⁸ Kinyek kere, konyoi: kotupa ŋes,

²⁹ Kipoik Lebi ŋes epucit loepol koreke: kojau ekodet loepol laka iketelemak esolo ka ke lukemorete kakes,

³⁰ Kirurumakis Iparisayon ka ikewadikakakec ikekesisiak kobalas ebe, “Kanukinyo inyamiata imasiata da nepepe ka iketelemak esolo ka ikadiakanarak da?”

³¹ Koboŋok Yesu kotema kes atiar, “Lukaŋaleok mam ipudas emurwon; dimarai lukadekak.

³² Mam abunit anyarit ikadolitok, dimarai ikadiakanarak tetere itoronikinos.”

³³ Kotemasi ŋes atiar, “Eluŋete ikesisiak luka Yokana irwan ipu, ka ailip; ikote nen da ikesisiak luka Iparisayon; konye lukon enyamete emasete da.”

³⁴ Kotema Yesu kes atiar, “Ipedorete kereka aituluŋ luenyaritai opucit loka eiterane, naejaatar keteran?

³⁵ Konye eponito apaarasia, nuedemarere eteran, eluŋete do kapaarasia kaŋun.”

³⁶ Kolimok kes awaragan, ebe, “Emamei yeneciluni atutubet kanapito nakitetet, ka adonyokin ŋes anapito namojoŋ; arai kikonaki nen eciluni nakitetet, atutubet da naecilunio kama kanakitetet, mam ecamanaros kanamoion.

³⁷ Emamei da yenebukokini ebino loitet oriagin lukemukule lumoioŋ; arai kikonaki nen, ecili ebino loitet iriagin, ebukor ebino, imadiŋikinos iriagin da.

³⁸ Konye ebukonokinio ebino loitet oriagin lukitetiak.

³⁹ Kwabo emamei yenemasi ebino loikuniatai, yenekoto loitet; naarai ebala ebe, ‘Ejok loikuniatai.’ ”