Luka 22 - Ebaibuli

¹ Kosodi koapu epucit loka Imugatin lumam itubuunitoi loenyaritai Aleleŋ.

² Komootos isasedotin lupeti ka ikewadikak epone loka aiar ŋes; naarai apotu kokuriaka ituŋa,

³ Kolomak Satan Yuda loenyaritai Isikariot, lokerai ediopet kotomon ka luarei;

⁴ kolot kinerut ka lusasedotin lupeti, ka ikapolokitok iserikalei, epone loka aijaikin ŋes akaninikec.

⁵ Kiyalamikinos, kitutukoto ainakin ŋes arupian.

⁶ Kocam, komo apak naka aijaikin ŋes mamakec, komamei ekodet.

⁷ Kodol apaaran naka Imugatin lumam itubuunitoi, naibusiar aaria imerekekin lukaleleŋ.

⁸ Kiyakia Yesu Petero ka Yokana kobala ebe, “Koloto kitemonokis lukaleleŋ kanuwok, tetere kinyami.”

⁹ Kotemasi ŋes atiar, “Ikoto ketemokis lali?”

¹⁰ Kotema kes atiar, “Koany, nailomariata ore, iriamunos ketuŋanan loibwokit amot naka akipi; kotupasi ŋes, kolomasi togo loelomari ŋesi,

¹¹ Ilimokinete elopet etogo ebe, ‘Ebala Ekesisianakinan ebe, Ani bo agola nakipejok, neanyamakini lukaleleŋ nepepe kikakesisiak?’

¹² Kitodikini ŋesi yes agola naepol nakokuju naepesitai; kitemonokis nen.”

¹³ Koloto, kodumutu kwape kelimokinia; kitemonokis lukaleleŋ,

¹⁴ Nakedolio apak, kiboikin ainyam nepepe kikekesisiak.

¹⁵ Kotema kes atiar, “Abu kemiela noi aimor kayes lukaleleŋ lu, eriŋa eoŋ kiticana;

¹⁶ naarai katemari yes atiar, Mam anyami bobo Iukaleleŋ kiton naitodolikinere kotoma ajakanut naka Edeke.”

¹⁷ Kolem akoli, kedau aimal kobala ebe, “Kolemutu na, kijaanakinos:

¹⁸ naarai katemari yes atiar, Amear kwana mam amasi araito nuka emusabibu kiton neebunio ajakanut naka Edeke.”

¹⁹ Kolem emugati, kedau aimal, kobilibil, koinak kes, kobala ebe, “Lo ŋes akakuan, nakeinakinio kanukus: kiswamaenenete kwaŋin akiitunitor eoŋ,”

²⁰ Ka akoli da kwape kwaŋin kedautu ainyam, kobala ebe, “Akoli na erai aitutuket nakitetet kotoma aokotoka, nuebukoros kanukus.

²¹ Konye koany, akan naka ŋol kalokabilakini ebotet ejai keoŋ omesa.

²² Naarai elosi Okoku loka etuŋanan kwape kelosikinitere; konye itukwi etuŋanan ŋol loebilakini ŋes ebotet!”

²³ Kogeutu aiŋitanar bonik ebe Iŋai bo kakesi ekoto aswam akirot ŋin.

²⁴ Kolom epeget kotomakec ebe, Iŋai bo loeomitai araut lokapolon.

²⁵ Kotema kes atiar, “Irumitos ikabakan lukacekwapin ikecetuŋa; ŋul da lukapedor kamakec enyaritai ikeswamak ajokis.

²⁶ Konye yes mam ikote kwaŋin, dimarai lokapolon kamakus koraun bala erai lodidi, ka lokeŋarenikinon da bala ŋol loijaanakini.

²⁷ Naarai iŋai bo lokapolon, ŋol loiboikini ainyam, arai bo ŋol lojaanakini? Mere tope je loiboikini ainyam? Konye ajai eoŋ kokidiŋikus bala ekejaanakinan.

²⁸ “Iraas yesi luipotu kotitiŋikis keoŋ kotoma acodunioka;

²⁹ eoŋ da keŋadakinit yes ajakanut, kwape keŋadakinitor Papaka eoŋ,

³⁰ tetere inyamete ka aimat komesaka kotoma ajakanutuka, ka aiboikin oicoloŋo luka ajakanut, itubokinete atekerin atomon kanuarei nuka Isirael.

³¹ “Simon, Simon, koany, enit Satan yes, tetere kipiesi kwape kalos,

³² Konye kelipak eoŋ jo kinyek akoniiyuun akurwor; ijo da naibelokinor, kitogogoŋ ikoniinacan.”

³³ Kotema ŋes atiar, “Ejakait, etemokino aupar kajo aenio, kiton atwanare da.”

³⁴ Kotema atiar, “Kalimokini jo, Petero, ebe mam lolo ekokor eruikini aitodol nakiŋerio eoŋ irwan auni ebe mam kijeni.”

³⁵ Kiŋit kes ebe, “Nakejukaritor yes emamei eriagi, karaida ecoe, karaida amuk, ipotu kereka kipudas imodiobore?” Kobalas ebe, “Mam,”

³⁶ Kotema kes atiar, “Konye kwana, yenejai eriagi koyaŋa, ka yenikecoe da kwape kwaŋin. Yenemamei ekileŋ kogwela ekelou, kogwelunia.

³⁷ Naarai katemari yes atiar, Ibusakinit ŋun nuewadikatai aitodolikinio mamakaŋ ebe, ‘Aponi kimarakinai nepepe ka lukepali’; naarai nukabeito eoŋ ejaas aitodolikiniokec.”

³⁸ Kobalas ebe, “Ejakait, koany, ejaas ne ikileŋa iarei.” Kobala kes ebe, “Aso do.”

³⁹ Kolom, kolot Moru loka Iseitunin, kwape atapitor; kotupasi ikekesisiak da.

⁴⁰ Nakedolio aibois ŋin kotema kes atiar, “Kilipa, kinyeis alomar toma acodunio.”

⁴¹ Kotiakar ŋesi elopet bala apak naetiakara amoru, kokukokin, kilip,

⁴² ebe, “Wu Papa, arai ikoto, kolema akoli na kamakaŋ; konye mere nuakoto eoŋ, dimarai nuikoto ijo kiswamai.”

⁴³ Kitakanikin ŋes emalaika loabuni kokuju, kitogogoŋ ŋes.

⁴⁴ Kosodi kanuka aikilianar kiyatak noi ailip; kosubito ainyinyirake bala imany luka aokot nuedoenenete kwap,

⁴⁵ Nakenyounio kotoma ailipike, kobu mama ejaas ikesisiak kodum kes ejotoete kanuka aiturur.

⁴⁶ Kotema kes atiar, “Kanukinyo ijotooto? Konyoutu kilipa kinyeis alomar toma acodunio.”

⁴⁷ Atipet napinera ŋesi, koany, kotakan ekodet, iŋarenikinit etuŋanan loenyaritai Yuda, ediopet kotomon ka luarei. Kikunyak mama ejai Yesu tetere enui.

⁴⁸ Kotema Yesu ŋes atiar, “Yuda, ibilakini kereka ijo Okoku loka etuŋanan ebotet kainu?”

⁴⁹ Ŋul da lukejaas die kaŋes, kojenutu nuekotosi adoikin, kobalas ebe, “Ejakait, kajepejepata ca kikileŋa?”

⁵⁰ Ediopet kakesi kojepe ebulesit loka losasedoti lopeti kotubo akekit nakoteten,

⁵¹ Koboŋok Yesu ebe, “Kinyeis ŋun!” Kotiro akekit kitaŋaleu.

⁵² Kosodi kobala Yesu isasedotin lupeti ka ikapolokitok luka eyekalu ka imakio lukeponikinito ŋes ebe, “Ilomutu ca ikapito ikileŋa ka ibelai bala aikamun ekaŋatan?

⁵³ Apaarasia kere ajaenena eoŋ nenipe kayes toma oyekalu, konye mam ipotu kikamut eoŋ. Konye lo erai ekusisawa, ka apedor naka amuton.”

⁵⁴ Kosodete kikamut ŋes, koyaata togo loka losasedoti lopeti, konye kotupite Petero kama elwana.

⁵⁵ Kedaut ainokokin akim kidiŋ alaro, kiboikinos nepepe, kiboie Petero da kokidiŋikec,

⁵⁶ Kanen koany apese ŋes, iboie kaneejai akim, kojene, kobala ebe, “Ajaas nan etuŋanan lo nenipe kaŋes.”

⁵⁷ Konye koŋer, kobala ebe, “Ŋo ba na, mam eoŋ ajeni ŋes,”

⁵⁸ Nediokasilon koany ece ŋes, kobala ebe, “Ijo da irai lokec.” Konye Koboŋok Petero ebe, “Ijo ba lo, mere eoŋ,”

⁵⁹ Ketubor bala esawa ediopet kitogogoŋ ece ebe, “Abeit ajai lo nepepe kaŋes; naarai erai ŋesi da Egalilayat.”

⁶⁰ Konye kobala Petero ebe, “Ijo ba lo, mam ajeni nuinera ijo.” Atipet napinera ŋesi koruik ekokor.

⁶¹ Kibelokin Ejakait kosesen Petero. Kiitu Petero akirot ya naka Ejakait, nakelimokinit ŋes ebe, “Lolo, eriŋa ekokor eruikino, kiŋeri eoŋ irwan auni.”

⁶² Koloma kiŋa komony noi.

⁶³ Kosodete ituŋa lukikamunete Yesu koboliatar ŋes, kinomonomata;

⁶⁴ korapanakis akekonye kiŋita atiar, “Kodwaru cani! Iŋai bo kinom jo?”

⁶⁵ Koinyanakinete da kakiro nuipu nuka amoromor.

⁶⁶ Kosodi kiwala akwap, kotukonokin atukot naka imakio luka ituŋa, ka isasedotin lupeti ka ikewadikak; koyautu toma aurianetekec, kobalas ebe,

⁶⁷ “Arai irai ijo Kristo, kolimokinai.” Kobala ebe, “Karaida kaalimokis yes, mam iyuunete cut;

⁶⁸ Arai keeŋit yes, mam iboŋokinete.

⁶⁹ Konye amear natikwana iboikin Okoku loka etuŋanan akan nakoteten naka apedor naka Edeke.”

⁷⁰ Kobalas kere ebe, “Aso irai kereka ijo Okoku loka Edeke?” Kobala kes ebe, “Yes ibalas ebe arai eoŋ.”

⁷¹ Kobalas ebe, “Kipudar bo inyo bobo nuitejenunete? Naarai kiira oni ikulepek akiro nuka aitukuke.”