Luka 2 - Ebaibuli

¹ Kosodi kanen kapaarasia kaŋun, kobu ekisil kama ka Kaisar Augusito ebe ibusakinit ituŋa luka akwapin kere aiwadikao.

² Ŋin ŋes aiwadikao nasodit nakeraar Kuirinio ekayaiton loka Suria.

³ Koloto ituŋa kere aiwadikao, ŋinituŋanan bukec.

⁴ Konyou Yosep da koGalilaya, kore Nasaret, kodoka alosit Yudaya, ore loka Daudi, loenyaritai Betelekem, naarai kerai ŋesi lokokek ka ajena naka Daudi;

⁵ tetere iwadikao nepepe ka Mariam, nakisinerit ŋesi, epotiei.

⁶ Kosodi kanen, ejaas ŋina, kodoloto akepaarasia nuka aidoun.

⁷ Kidou yenikiyaike yenisapat; kimuko kigoen lukimukeru, kiperik atuba nakenyamenenata ibaren, naarai mam adumunito apak kotogo loka ipejok.

⁸ Kojaas ikecokok kakwap kaŋin lukiboiete kais idarete ekecesipan kuare.

⁹ Kotakanik kes emalaika loka Ejakait, kocau aŋosibib naka Ejakait airiamar kes: kokuriakaros noi.

¹⁰ Kotema emalaika kes atiar, “Sirikikuriakaros; naarai koany, kainunit yes akiro nukajokak nuka aiyalama naepol naejauni mama ejaas ituŋa kere;

¹¹ naarai auruun lolo kanukus Eketaiaran, ŋes Kristo Ejakait kotoma ore loka Daudi,

¹² Na ŋes aanyunet kamakus; idumunete ikoku yenimukeru imukoritai kigoen lukimukeru, eperi kotoma atuba nakenyamenenata ibaren.”

¹³ Atipet kojai nepepe kemalaika kaŋol ekodet loka ajore naka akuj ituritos Edeke, ebalasi ebe,

¹⁴ “Kojai aibuses mama ejai Edeke kokuju kakuj, Ka ainapakin da kakwapin mama ejaas ituŋa luitoiokit.”

¹⁵ Kosodi kanen, kenyout imalaikan aboŋor toma akui, kotemanaros ikecokok ebe, “Aso kaloto kiton Betelekem, kaanyut ŋun nuiswamatai, nukitejenu Ejakait oni,”

¹⁶ Koloto atipet, kodumutu Mariam ka Yosep, nepepe kimukeru eperi katuba nakenyamenenata ibaren,

¹⁷ Keanyutu, kiteienut akirot nakelimokinio kes naka ikoku kaŋin,

¹⁸ Koumokis lukiirarete kere akiro nukelimokinete ikecokok.

¹⁹ Konye koricite Mariam akiro ŋun kere, koomite kotauke.

²⁰ Koboŋosi ikecokok, itopoloorito ituritos da Edeke kanuka akiro kere nukiirarete, ka nuaanyut da, kwape kelimokinitere.

²¹ Kedolo apaarasia akanykauni nuka aikep ŋes, komaikis ekekiror Yesu, kwape kemaikinia emalaika eriŋa epotuuno.

²² Kedol apak naka aitesegariokec kwape ejaar ekisil loka Musa, koyaŋaasi ŋes Yerusalem aitodiar mama ejai Ejakait.

²³ (Kwape iwadikatere kokisil loka Ejakait ebe, “Ŋinikoku yenikiliokit yenepukori aliliget enyaritai yenikalaunan mama ejai Ejakait.”)

²⁴ Koinakis da asuban kwape kineritere kokisila luka Ejakait, “Ajeleik aarei arai ilukei iarei ludidik.”

²⁵ Ido koany, kejai etuŋanan Yerusalem, ekekiror Simeon, kerai etuŋanan loedolit loeyoŋit Edeke, edaret aitalakario naka Isirael, kejai ŋes Emoyo Lokalaunan.

²⁶ Kikwenyarit Emoyo Lokalaunan ŋes ebe mam etwani eroko eanyuna Kristo loka Ejakait.

²⁷ Kobu ŋol toma oyekalu iŋarenikinit Emoyo; ido nakeyauniata ikauriak ikoku Yesu tetere iswamakinete ŋes kwape ejaar epone loka ikisila,

²⁸ kodak ŋes elopet kakaninike, kimal Edeke, kotema atiar,

²⁹ “Ejakait, kotwar kwana ekonibulesit inapakina, Kwape ejaar akonikirot;

³⁰ Naarai aanyut akakonye akoniitajar,

³¹ Nakitemonokinit kakonyen nuka ituŋa kere,

³² Aica naapukoo lukaŋekwapin, Araun aibuses naka ikonituŋa Isirael.”

³³ Koumokis papake ka totoke ŋun nukinerai kanukeŋ.

³⁴ Kilipak Simeon kes arereŋ, kotema ŋesi Mariam totoke atiar, “Koany, ibwaikinitai ikoku yen kanuka aibiror ka anyoun da naka luipu kotoma Isirael, Ido araut aanyunet naitepegitai.

³⁵ Ijo da alopet kicumi ekileŋ ekonitau, Tetere epukoros aomisio nukotauon kaluipu.”

³⁶ Kejai da anabi, ŋes Ana, akoku naka Panuel loka ateker naka Aser; kedaunit ikar luipu, kiboikino kokilenike ikar ikanykaarei ameun kabekonutuke,

³⁷ kerai apuserut ikar akaisakanykauni ka luoŋon, Mam kenyoununei koyekalu, konye komaenenei Edeke paaran ka kuare da kailuŋ ka ailip.

³⁸ Kotakanu ŋin da kapak kaŋin, kimala Edeke, kolimok lukidareto alakunio naka Yerusalem nuka ikoku.

³⁹ Kosodete nakedauniata aitodolikin kere kwape kicorakinitere kotoma okisila luka Ejakait, koboŋosi Galilaya, orekec Nasaret.

⁴⁰ Kopoloor ikoku, kiyatakin agogoŋ, kileleba acoa; asianut da naka Edeke kojai kaŋes.

⁴¹ Kolosenenete ikauriakake ŋolikaru Yerusalem apak naka epucit loka Aleleŋ.

⁴² Nakedol ŋesi ikar itomon kaarei, koloto kwape kejaar epone loka epucit;

⁴³ nakedaut aitodolikin apaarasia, apak naka aboŋorikec, kosalak isapat Yesu Yerusalem, komam ikekauriak ejenete.

⁴⁴ Konye koomitos kesi ebe ejai toma okodet, koloto alosit naka apaaran adiopet; kosodete komoata ŋes opajenakec ka opaperokec da.

⁴⁵ Nakekurwokis adumun, koboŋosi Yerusalem emootos ŋes.

⁴⁶ Kosodi kanen, ketuboros apaarasia auni kodumakis ŋes oyekalu, iboie kokidiŋ kikesisianakinak, epupi, kiŋisi da aiŋiseta.

⁴⁷ Koumokis kere lukiirarete ŋes akeijen ka akeboŋonokin da.

⁴⁸ Nakeanyuniata, koumokis: kotema totoke ŋes atiar, “Ikakoku, kanukinyo kikonakinia sio kwaŋin? Koany, papakon ka eoŋ da kipou kamootos jo kaiturur.”

⁴⁹ Kotema kes atiar, “Kanukinyo kimoiata eoŋ? Mam kereka yes ijenete ebe kebusakinit aiboi kotogo loka Papaka?”

⁵⁰ Mam kes apotu kojenut akirot ŋin nakelimokini kes,

⁵¹ Kijesar nepepe kakes, kiton Nasaret; kononokikinite kes. Koricite totoke akiro ŋun kere kotauke.

⁵² Kiyatanakini Yesu kotoma acoa ka apoloor, ka asianut mama ejai Edeke ka ituŋa da.