Luka 18 - Ebaibuli

¹ Kolimok kes awaragan, aikwenyar ebe ibusakinit kes ailipenen Edeke komam itapalikina.

² Kotema kes atiar, “Kojai kolo ekatubon ore ece, lomam eyonit Edeke, kwabo mam kepodo ituŋa.

³ Kojai da apuserut ore ŋol; nakicebokinit abunenen mamake, kobala ebe, ‘Kigaŋai kama kalokasurupika.’

⁴ Koŋer ber; konye kokau kotema kotauke atiar, ‘Karaida mam ayoŋit Edeke, karaida mam apodo ituŋa,

⁵ konye naarai kecebokinit apuserut na, egaŋi ŋes, kenye aitapas eoŋ kanuka arim tiritir neajai.’ ”

⁶ Kotema Ejakait atiar, “Kiirasi nuenera ekatubon lomam edolit.

⁷ Mam kereka igaŋi Edeke luseunake, luemonyakinete paaran ka kuare, etitiŋikinit ŋesi kanukec?

⁸ Katemari yes atiar, Igaŋi kes atipet. Konye naebunio Okoku loka etuŋanan, edumuni kereka aiyuun kakwap?”

⁹ Kolimok da awaragan na ituŋa lukemunokina ebe eraas kesi luedolito komwaŋito luce;

¹⁰ “Kodokasi ituŋa iarei oyekalu ailip, ediopet Eparisayot, loce da eketeleman esolo.

¹¹ Kobwo Eparisayot kilip kwana kotauke ebe, ‘Wu Edeke, kemalai jo naarai mam eoŋ kiputo kicetuŋa, ikaŋatak, ikeŋalak, idotea, karaida bala lo eketeleman esolo.

¹² Aluŋenenei eoŋ irwan aarei ŋinisabato, ainanakini da yenikitomonet kotoma kaluadumuni kere.’

¹³ Konye kobwo eketeleman esolo kama elwana, kwabo mam ketitinikinit aikeun akekonyen akuj, konye kodipidip aketorob, kobala ebe, ‘Wu Edeke, kitimoi eoŋ ekadiakanaran!’

¹⁴ Katemari yes atiar, Abu ŋol kodok alosit oreke imarakinitai adolit aitelekarit je; naarai ŋinituŋanan yeniturokin itisilio, konye yenitisilikin iturio.”

¹⁵ Koinunai idwe ludidik da tetere etirori kes; konye nakeanyuniata ikesisiak, kitorona kes.

¹⁶ Konye Yesu konyarau kes kotema atiar, “Kocamutu idwe ludidik abunore mama ajai, kwabo sirikisimika kes; naarai lueputosi kalu ajakanut naka Edeke erai nakec,

¹⁷ Abeit katemari yes atiar, ŋin yenimam iyuuni ajakanut naka Edeke kwape kikoku yenididi, mam cut elomari toma.”

¹⁸ Kiŋit ŋes ekayaiton ediopet ebe, “Ekesisianakinan Iokajokan, keswama anyoika tetere erumi aijar naka ikar kere?”

¹⁹ Kotema Yesu ŋes atiar, “Kanukinyo kinyaraa eoŋ lokaiokan? Emamei yenikajokan dimarai ediopet, ŋes Edeke.

²⁰ Ijeni aicorakineta ebe: ‘Siridote, Siriari, Sirikokoi, Sirisabanakinenei, Koyoŋitenenei papakon ka totokon.’ ”

²¹ Kotema atiar, “Aricit ŋun kere ameun keiditeuka.”

²² Nakiiraria Yesu ŋun, kotema ŋes atiar, “Eriŋa kiwolikit adiopekirot. Kogwela luijaatar kere, kokoranak lukican, ijaunete moolo kabar kotoma akuj; kosodi kobu, kotup eoŋ.”

²³ Konye nakiiraria ŋun kokadak noi, naarai kebarit noi.

²⁴ Nakesesenia Yesu ŋes kotema atiar, “Etiono cama lukabarak alomar ajakanut naka Edeke!

²⁵ Epatana ekaal aitor apedot naka ekus, itia ekabaran alomar ajakanut naka Edeke.”

²⁶ Kotemasi ŋul lukiirarete atiar, “Aso iŋai bo do epedori aitaiario?”

²⁷ Konye kotema atiar, “Numam epedorio kotuŋa epedorio kama ejai Edeke.”

²⁸ Kobala Petero ebe, “Koany, kipou isio kenyeis ikosiboro katuputu jo.”

²⁹ Kotema kes atiar, “Abeit katemari yes atiar, Emamei etuŋanan loenyeinit etogo arai aberu, arai iinacan, arai ikauriak, arai idwe, kanuka ajakanut naka Edeke,

³⁰ lomam edumuni ipu noi aitelekarit kapak kana, ido kokar luepote aijar naka ikar kere.”

³¹ Koyaŋa lutomon ka luarei, kotema kes atiar, “Koany, kidokari alosit Yerusalem, itodolikinio akiro kere nukiwadikaete kolo inabin kama ka Okoku loka etuŋanan,

³² Naarai einakinio mama ejaas Imo, eboliatar, iswamakinio nukepali, imwaanakinio aimul:

³³ edaete ka aiar ŋes; kapaaran da nakiwuniet ejaruni.”

³⁴ Konye mam kes apotu kojenut adis kaŋun; naarai kimunonikinitai kes akirot ŋin, kwabo mam ejenuna nukinerai.

³⁵ Kosodi kanen, nakeapiaria Yeriko, kejai etuŋanan emuduk iboie kawai kerot ilipitoi.

³⁶ Nakiiraria ekodet itorit, kiŋit ebe, “Ikote bo ai ŋun?”

³⁷ Kolimokis ŋes ebe, “Yesu loko Nasaret itorit.”

³⁸ Kiworo ebe, “Yesu, okoku loka Daudi, kitimoi eoŋ.”

³⁹ Ŋul da lukiŋarenito kiretakis tetere ililiŋi: konye ŋes kiyatak noi aiworo ebe, “Wu jo okoku loka Daudi, kitimoi eoŋ.”

⁴⁰ Kobwou Yesu, kicorak ayaunio mama ejai, Napekeapiki, kiŋit ŋes ebe,

⁴¹ “Ikoto keswamak jo inyo?” Kotema atiar, “Ejakait, akoto kakweny.”

⁴² Kotema Yesu ŋes atiar, “Kokweny: kitaŋaleu jo akoniiyuun.”

⁴³ Atipet kokweny, kotupa ŋes, itopoloorit Edeke. Nakeanyuniata ituŋa da kere, kituritos Edeke.