Luka 14 - Ebaibuli

¹ Kosodi kanen nakelomaria ainyam togo loka ekayaiton ediopet loka Iparisayon kapaaran nakasabato, kiteikinito,

² Kosodi koany, kiŋarenike kejai etuŋanan lokedeka eidada.

³ Koboŋok Yesu iricakisila ka Iparisayon kobala ebe, “Ibus kereka aitaŋaleun kapaaran nakasabato arai bo mam?”

⁴ Konye kes kililiŋata. Kitim, kitaŋaleu ŋes, kotwar.

⁵ Kotema kes atiar, “Iŋai bo kayesi, arai kibirokin akeiteŋ arai akesigiria toma aipany, yenimam iriuni ŋes atipet kapaaran nakasabato?”

⁶ Kes da mam apotu kopedosi aboŋokin ŋun.

⁷ Kolimok awaragan ŋul lukenyaraunitai, naaanyunia epone lokeseata kesi iicoloŋo lukapolou, kobala kes ebe,

⁸ “Arai kinyararit jo ituŋanan opucit loka eiterane, sirikiboikin oicoloŋ lokapolou, kinyek loenyarit ŋesi lokitelekarit jo apolou abunore.

⁹ Kosodi ŋol lokiinyarari jo ka ŋes alimokin jo ebe, ‘Koosik lo aibois,’ kanen kigeunete ileic airum, ibei da aibois nakokwap.

¹⁰ Konye nakinyararere, kolot kiboikin aibois nakokwap, tetere naebunio je lokinyararit jo kolimok ebe, ‘Opapero ba, kikuny ne kuju’; kanen ijaunete kaibuses kakonyen nuka ŋul kere kalukiboiete kajo.

¹¹ Naarai ŋin kere yeniturokin itisilio, ka yenitisilikin iturio.”

¹² Kotema da lokenyarit ŋes atiar, “Naipoio inyamat luka paaran arai luka eboŋ, sirikinyarau ikonipapero karaida ikoniinacan, karaida ikonipajen, karaida iidunyeta lukabarak, kinyeis ŋul anyarar jo bobo, jo da kitacakinio.

¹³ Konye naipoio epucit, konyaraununei lukican, ka iŋwalasik, ka luicodos, ka imudukiok da,

¹⁴ kwaŋin kisirereŋitoi; naarai emameete ŋul lukitacakiniata; naarai kitacakinio kotoma ajarun naka luedolito.”

¹⁵ Nakiiraria ŋun ediopet kalukemorete kaŋes, kotema atiar, “Isirereŋitoi ŋin yenenyami atap kotoma ajakanut naka Edekel.”

¹⁶ Konye kotema ŋes atiar, “Kojai etuŋanan loabu kipo epucit loepol, konyarau ituŋa luipu;

¹⁷ kedol apak naka ainyam kiyakia ekebulesit alimonokin kwi luanyaritai ebe, ‘Kopotu; naarai adaun aitemonokin iboro kere.’

¹⁸ Konye kogeutu kere aiyanar kediopetau. Kobala losodit ebe, ‘Agwel emanikor, kebusakinit alosit aanyun; keŋaiŋait kiikinai.’

¹⁹ Kobala ece ebe, ‘Agwel imoŋin ajookon akany, alosi aitetemor; keŋaiŋait, kiikinai.’

²⁰ Kobala ece ebe, ‘Amany aberu, ŋes mam apedoria abunore.’

²¹ Kobu ebulesit kolimok ejakaitike akiro ŋun kere. Kosodi konyunyurikin elopet etogo, kotema ekebulesit atiar, ‘Koloma atipet kolot toma orotin ka isokono da luka ere, koyau ne lukican, ka iŋwalasik ka imudukiok, ka luicodos da.’

²² Kotema ebulesit atiar, ‘Ejakait, ŋun nukicorak eswamasi, konye ca eriŋa aibois ejai.’ ”

²³ Kotema ejakait ebulesit atiar, “Koloma kolot orotin lukapolok ka asisiarin da, kitiŋau ituŋa alomun, tetere ilelebun ekatogo.

²⁴ Naarai katemari yes atiar, Kotoma kwi kalukenyaritai emamei edio da loiiri ekapueit.”

²⁵ Kouparos ikodeta luipu kaŋes; kibelokin kotema kes atiar,

²⁶ “Arai ebuni etuŋanan mamaka, komam elai papake, ka totoke, ka nakowaike, ka ikedwe, ka ikeinacan ka ainacan, eebo, kiton akeijar alopet, mam epedori araun ekakesisian.

²⁷ Ŋin yenimam erioŋi ekemusalaba, katup eoŋ, mam epedori araun ikakesisian,

²⁸ Naarai iŋai bo kayesi, arai ekoto aiduk etogo loeoja, mam iboikini ber aimar eketiai, ebe luejaatar edaunete?

²⁹ Kinyek diat kedau aipet apetetait, komam epedori adaun, egeunete ituŋa kere lueanyunete akienar ŋes,

³⁰ kobalas ebe, ‘Abu etuŋanan ŋol kogeu aiduk, komam epedori adaun.’

³¹ Arai bo ekabaka enyoin, arai ekoto alosit ejie kekabaka ece, lomam ber iboikini ainerun arai epedori kilukumin itomon airiamakin kaje loebunit asurokin ŋes kilukumin akaisaarei?

³² Arai keanyu ebe mam epedori, iyakiari ikiyakia ailip nukainapakin, eriŋa je elwana.

³³ Aso kwaŋin ŋinituŋanan kayesi, yenimam epaluni luejaatar kere mam epedori araun ikakesisian.

³⁴ “Ejok abalaŋ; konye arai kepianiar abalaŋ, itemokinio kinyo?

³⁵ Mam ibusakini alup, karaida etut; ebukorete ituŋa kiŋa, Yenejaas aki nuka akiirar, kiira.”