Luka 13 - Ebaibuli

¹ Kapak kanipe kaŋin kojaas ituŋa lukitejenunete ŋes nuka Igalilayan, lukinyalakini Pilato akeceokot kasubanakec,

² Koboŋok kotema kes atiar, “Iwomito kereka ebe keroko Igalilayan ŋul aitelekarit Igalilayan ice kere, naarai iticanio ŋun?

³ Katemari yes atiar, Mam; konye arai mam yes itoronikinos, imudiaros kere kwape kwaŋin,

⁴ Arai kwi itomon kakanykauni lukibirokin etogo loeoja, koSiloam, koara kes, iwomito kereka ebe ebucarito ŋul aitelekarit ituŋa kere lukiboiete koYerusalem?

⁵ Katemari yes atiar, Mam; konye arai mam yes itoronikinos, imudiaros kere kwape kwaŋin.”

⁶ Kiner awaragan na ebe, “Kejai etuŋanan ka etini lokiraikinitai manake naka emusabibu; kolot amoot araitoke, mam edumuna.

⁷ Kotema ŋesi ekeswaman loka amana naka emusabibu atiar, ‘Koany, ikar iuni lu abu amoot araito naka etini kalo, mam adumunit amodio. Kojepa; kanukinyo imadiŋikinia alup?’

⁸ Koboŋok kotema atiar, ‘Ejakait, kinyek ber ekaru lo da, kebokibok kewor da.

⁹ Arai kera do araito okaru je, ejok; konye arai mam, ijepari.’ ”

¹⁰ Kapaaran nakasabato isisianakini kotoma adiopet katukosia.

¹¹ Ido koany, kojai aberu nakejai ajokit nakalany ikar itomon kakanykauni; nakekudokina, komam epedori cut aitenar,

¹² Nakeanyunia Yesu ŋes, konyarau, kotema ŋes atiar, “Toto, kilacar kotoma akalanyanutukon.”

¹³ Kidokok ŋes akekanin, atipet kitenar, kitopolo Edeke.

¹⁴ Konye konyunyura ekayaiton loka atukos naarai etaŋaleun Yesu kapaaran nakasabato, kotema ituŋa atiar, “Ejaas apaarasia akanykape nuejokiar ituŋa aiswamaa aswam; aso kopotu aitaŋaleunio kapaarasia kaŋun, kwabo mere kapaaran nakasabato.”

¹⁵ Konye Ejakait Koboŋok ebe, “Yes lukesoswai! Kapaaran nakasabato mam kereka ilacununete ninidioper kayes ekemoŋ arai akesigiria kotoma auj, koyaŋa aitamat?

¹⁶ Aberu na da, naerai aur naka Aburaam, nakeeni Satan ikar lu itomon kalukanykauni, mam tope kibusakinit alacakinio kaenet kana apaaran nakasabato?”

¹⁷ Nakinerar ŋun, kirumata ileic lukasurupoke kere: kiyalamikin ekodet kere kanuka akiro kere nukaibuses nukiswamai ŋesi.

¹⁸ Aso kotema atiar, “Eputos ajakanut naka Edeke kinyo? Etupusi kinyo?

¹⁹ Eputosi kecokat loka ekaradali lokelemari etuŋanan, kocakak toma omanikorike; kobwaŋ, koraun ekitoi; koperenenete akweny nuka apak atenieikike.”

²⁰ Kotema bobo atiar, “Etupusi kinyo ajakanut naka Edeke?

²¹ Eputosi kaitubuunet nakelemari aberu kibwa kotoma aitemisio auni nuka akiria, kiton neabuunioto kere.”

²² Kiyatak akelosit aitor koreria lukapolok ka ludidik, isisianakini, ebei Yerusalem,

²³ Kiŋit ŋes etuŋanan ediopet ebe, “Ejakait, ikidioko ca luitaiario?” Kotema kes atiar,

²⁴ “Kokokito alomar kokek kaloedidiŋ: naarai katemari yes atiar, Ekotokinos luipu alomar kwabo mam epedorete.

²⁵ Apak naanyounio elopet etogo agoloki da ekek, igeunete yesi aibwo kokiŋa, ka aikuŋukuŋ ekek, kobalas ebe, ‘Wu okwe Ejakait, koŋaarai;’ eboŋokini ŋesi etemari atiar, ‘Mam ajeni nekiponiata.’

²⁶ Kanen igeunete atemar atiar, ‘Kipou kanyama kamata da kakonyenekon, ijo da kisisianakini korotinikosi;’

²⁷ etemari ŋesi atiar, ‘Katemari yes atiar, Mam ajeni nekiponiata; irwa kamakaŋ, yes kere lukeswamak numam adolit.’

²⁸ Kanen ejaun aimony ka airiamanakin ikel, naianyuniata Aburaam, ka Isaak, ka Yakob, ka inabin kere, kotoma ajakanut naka Edeke, ka yes da ikulepek kicakario kiŋa.

²⁹ Epote ituŋa anyoun kokide, koto, ka agolitomei ka eŋalakimak da, iboikinos kesi toma ajakanut naka Edeke,

³⁰ Ido koany, ejaas lukawasia lueraunos lusodit, ejaas da lusodit, lueraunos lukawasia.”

³¹ Kosawa kaŋol kopotu Iparisayon ice kotemasi ŋes atiar, “Konyou kane kolot nenice; naarai ekoto Kerode aiar jo.”

³² Kotema kes atiar, “Koloto kolimokis ekuwe ŋol ebe, ‘Koany, ereŋeari ajokin, etaŋaleununei da lolo ka moi, kapaaran nakiwuniet etodolikin.

³³ Konye kebusakinit aibe ekarot lolo ka moi, ka apaaran naetupakini da; naarai mam ibusakinit enabi amudiario kokiŋa naka Yerusalem.’

³⁴ Wu okwe Yerusalem, Yerusalem, loeari inabin ka aibiribir kamor ŋul lukiyakunio mamakon! Irwan imwa ai abu kakotor atukonokin ikonidwe kwape etukonokinia akokor ikemiyoi kwap abebenokake, konye mam yes ekotokino!

³⁵ Koany, kinyeinere ekusitogo. Katemari yes atiar, Mam kianyunete eoŋ bobo cut, aitodol naitemariata atiar, ‘Isirereŋitoi ŋol loebunit kokiror loka Ejakait!’ ”