Luka 1 - Ebaibuli

¹ Naarai apotu luipu kotamakis aiwadik kotenan akiro ŋun nuetodolikinos kamawok,

² kwape kiilimonokiniata kwi lukeraas ikajenak lukeanyunito ameun kageunet, ido ikejaanakinak luka akirot kaŋin,

³ ketojok eoŋ da, naarai abu kamoote abeit naka akiro ŋun kere ameun kanusodit, kesuduny da, kewadikak jo Teopilo lokaibuses,

⁴ tetere ijenuni abeit naka akiro nukiisisianakinio.

⁵ Kapaarasia nuka Kerode ekabaka loka Yudaya, kejai esasedoti ekekiror Sakaria, loka abeanakin naka Abiya: kerai aberuke naka aur naka Aaron, ekekiror Elisabet.

⁶ Keraas kesi kere luedolito kakonyen nuka Edeke, kolosenenete kaicorakineta ka ikisila da kere luka Ejakait komam aitoronio.

⁷ Kemamei kes ikoku, naarai arakakit Elisabet, ido kemojoŋito kesi kere.

⁸ Kosodi kanen, nakiswamaa ŋesi aswam naka esasedoti kakonyen nuka Edeke, kwape kebeikinitor,

⁹ kwape kejaar epone loka esasedotene, kobeik ŋes eroet alomar aibois nakalaunan naka Ejakait, aisupuruun lukisupurununo.

¹⁰ Kilipi ekodet kere loka ituŋa kokiŋa kosawa loka aisupuruun.

¹¹ Kitakanikin ŋes emalaika loka Ejakait ebwoi kowai lokoteten loka etem loka aisupuruun.

¹² Nakeanyunia Sakaria ŋes, kiyaloŋoŋ, kokurianar.

¹³ Konye kotema emalaika ŋes atiar, “Sakaria, sirikikurianar; naarai eirar akoniilip, kiwurikini jo akoniberu Elisabet ikoku yenisapat, imaikini ekekiror Yokana.

¹⁴ Ilakar ijo, iyalamikin; ido isiyalamikinete luipu akeurunio.

¹⁵ Naarai eraun lokapolon kakonyen nuka Ejakait, kwabo mam emasi ajon karaida nuitemerete; ilelebun Emoyo Lokalaunan, ameun kakoik naka totoke,

¹⁶ Ido inyakuni ŋesi luipu kodwe luka Isirael mama ejai Ejakait Ekecedeke.

¹⁷ Iŋareni kakonyeneke komoyo ka apedor naka Eliya, ainyakun itauon luka lukapapa mama ejaas idwe, ka lukepali mama ejai acoa naka ikadolitok; aitemonokin Ejakait ituŋa luesikapikinitai.”

¹⁸ Kotema Sakaria emalaika atiar, “Ajenuni biai ŋun? Naarai amojoŋit eoŋ, akaberu da atuboros ikekar.”

¹⁹ Koboŋok emalaika kotema ŋes atiar, “Eoŋ Gaburiel, loabwoi kakonyen nuka Edeke; keyakuunitai einer kajo, ka alimokin jo akiro nu nukajokak.

²⁰ Ido koany, ililiŋi ijo komam ipedori einer, aitodol apaaran naedolioto nu, naarai mam iyuunit akakiro, nuitodolikinio kapakikec.”

²¹ Edarito ituŋa Sakaria, koumokis kanu etumoror kaibois nakalaunan.

²² Nakelomunia, mam apedori einer kakes: kojenut ebe aanyunit aitapoet kotoma aibois nakalaunan: kiyatak aitetem kakanin, kosal mam epedori einer.

²³ Kosodi kanen, nakitodolikinotor apaarasia nuka aijaanakinike, koboŋo oreke.

²⁴ Akaulo kapaarasia kaŋun kopotuu akeberu Elisabet; koŋop ilapio ikany, kobala ebe,

²⁵ “Kekonak Ejakait kwanata kapaarasia nukasesenia, tape kawoori ikaleic kakonyen nuka ituŋa.”

²⁶ Kolap lokikanyetekape aponi kijukunai emalaika Gaburiel kama ejai Edeke alosit Galilaya ore Nasaret,

²⁷ mama ejai abekot nakisinerit ekiliokit ekekiror Yosep, lokokek loka Daudi; ekiror loka abekot ŋes Mariam.

²⁸ Koloma emalaika mama ejai, kotema atiar, “Yoga, naisirereŋitoi noi, ejai Ejakait kajo!”

²⁹ Konye kiyaloŋoŋ ŋesi noi kanuka akiroke, koomoom kotauke ebe ikoni bo ai ayogan na,

³⁰ Kotema emalaika ŋes atiar, “Sirikiyoŋ, Mariam, naarai idum asianut kama ejai Edeke.

³¹ Ido koany, ipotuuni, idouni ikoku yenitelepat, imaikini ekekiror Yesu.

³² Eraun ŋol lokapolon, enyarao Okoku loka je Ioejai kuju kakuj; Ejakait Edeke einakini ŋes eicoloŋ loka Daudi papaake,

³³ irumi ekek loka Yakob ikar kere; akejakanut da mam enaŋi.”

³⁴ Kotema Mariam emalaika atiar, “Ikwaikinete bo ai ŋun, naarai mam ajeni ekiliokit?”

³⁵ Koboŋok emalaika ŋes ebe, “Kidoikini jo Emoyo Lokalaunan, kirapiari agogoŋ naka Je loejai kuju kakuj; kanuka ŋun yeneuruunio enyarao yenikalaunan, Okoku loka Edeke.

³⁶ Ido koany, Elisabet kinacikon, ŋes da epotiei ikoku yenitelepat kotoma amojoŋuke; elap lo da ŋes lokikanyetekape loka ŋin nakenyaritai arakan.

³⁷ Naarai emamei akirot naikaruni Edeke.”

³⁸ Kobala Mariam ebe, “Koany, arai eoŋ abulesit naka Ejakait; kojaut mamakaŋ kwape kakonikiro.” Kosodi konyou emalaika kamakeŋ.

³⁹ Kapaarasia kaŋun konyou Mariam, kisunya alosit akwap nakiukon, kiton ore ediopet loko Yuda;

⁴⁰ koloma togo loka Sakaria kiyoga Elisabet.

⁴¹ Kosodi kanen, nakiiraria Elisabet ayogan naka Mariam, kicuru ikoku kakoikike; kilelebai Elisabet Emoyo Lokalaunan;

⁴² kodelo jokan, kotema atiar, “Isirereŋitoi jo kotoma aŋor, isirereŋitoi da araito nuka aliligetekon.

⁴³ Kepote bo nu kai, toto naka Ekajakait abunore mamakaŋ?

⁴⁴ Naarai koany, napadolunio ayoganikon akiika, kicuru ikoku kakoikika kanuka aiyalama,

⁴⁵ Isirereŋitoi da ŋin naiyuunit; naarai itodolikinio nualimokinitai ŋes kama ka Ejakait.”

⁴⁶ Kotema Mariam atiar, “Itopoloori ekatau Ejakait,

⁴⁷ Elelakinit da ekamoyo Edeke Ekaketaiaran.

⁴⁸ Naarai aanyu ican luka akebulesit. Naarai koany, amear lolo kanyaritos eoŋ aturio kere naitusulianyitai.

⁴⁹ Naarai keswamaki Lokapedor nuepolok: Lokalaunan ekekiror.

⁵⁰ Akeitim ejai kaŋul lueyoŋito ŋes, Anatar aturio kere.

⁵¹ Etodia agogoŋ kakekan, Esiarisiar ikewoŋok kaomisio nuka itauonokec.

⁵² Ereŋea lukapolok koicoloŋokec, Etopolo luitasonos,

⁵³ Esimoniki Iuketeŋei iboro luejok, Epapel ikabarak.

⁵⁴ Eitu akeitim, Eŋaraki Isirael ekebulesit.

⁵⁵ Kwape kisumunio lukapapaawok, Aburaam ka aurike apaarasia kere.”

⁵⁶ Kosalak Mariam kaŋes bala ilapio iuni, kosodi koboŋo orekec,

⁵⁷ Kosodi kanen kodol apak naka Elisabet aidoun, kidou ikoku yenitelepat.

⁵⁸ Kiirasi ikeidunyeta ka ikepajen ebe etopoloo Ejakait akeitim mamakeŋ, kiyalamikinos nenipe kaŋes.

⁵⁹ Kosodi kapaaran nakikanyetekauni kopotu aikep ikoku; kokotosi amaikin ekiror loka papake Sakaria.

⁶⁰ Koboŋok totoke kotema atiar, “Mam, konye emaikinio Yokana.”

⁶¹ Kotemasi ŋes atiar, “Emamei yenikajenakon yenemaikinitai ekiror ŋol.”

⁶² Kokwetut papake ajenun ebe ekoto amaikin iŋai.

⁶³ Kilip ibore yenikiwadika, kiwadik ebe, “Ekekiror erai Yokana.” Koumokis kere.

⁶⁴ Atipet kopukoroi akeituk, kolacarai da akeŋalep, kiner, iturit Edeke,

⁶⁵ Kokuriakaros ikeceidunyeta kere, Kitisiarakinai akiro ŋun anatar akwap kere nakiukon naka Yudaya;

⁶⁶ kere lukiirarete koricata kotauonokec, kobalas ebe, “Aso eraun ikoku yen yenikepone enyoin?” Naarai akan naka Ejakait ajai kaŋes,

⁶⁷ Kilelebun papake Sakaria Emoyo Lokalaunan, kodwar kobala ebe,

⁶⁸ “Kituritete Ejakait Edeke loka Isirael, Naarai aanyana iketuŋa alaku da,

⁶⁹ Etonyoiki oni amumwarat naka aitajar Kokek loka Daudi eketelepat.

⁷⁰ Kwape enerar kolo kageunet Kaituke nuka inabinoke lukalaunak;

⁷¹ Ebe kitaiari oni kama kalukasurupowok, Kakan da naka ŋul kere lukireito;

⁷² Itodoli aitim naesumunit lukapapaawok, Ka aiitun akeitutuket nakalaunan,

⁷³ Aitodolikin aiyaposit naeyapoikinit Aburaam papaawok,

⁷⁴ Ainakin oni ketajarunos kakan naka lukasurupowok, Kejaanakis ŋes komam kikuriaka;

⁷⁵ Kotoma alaunit ka adolit kakonyeneke Apaarasia kere nuka aiiarawok,

⁷⁶ Ŋo da ikoku, kinyarao enabi loka Je loejai kuju kakuj; Naarai iŋareni kakonyen nuka Ejakait aitemokin ikerotin,

⁷⁷ Kitejen iketuŋa aitajario kotoma aisionio akecediakanareta,

⁷⁸ Kanuka aitim nakotau loka Edekewok, Kipejok oni Acilakide naabuni kokuju,

⁷⁹ Acaikin ŋul luiboete kotoma amuton, Kotoribe da lokatwanare, Aiteten awokokeie korot loka ainapakin.”

⁸⁰ Kopoloor ikoku, kiyatanakin agogoŋor komoyo; kojai kamodiŋo aitodol apaaran nakitakanikinor Isirael.