Kosea 6 - Ebaibuli

¹ “Kopotu kaboijosi neejai EJAKAIT; Naarai ŋes apoopoo, ŋes da kitanaleuni; Ŋes icumi, ijes da kimadi,

² Ketuboros apaarasia aarei kisikwaruni: Kitonyouni kapaaran nakiwuniet, Oni da kijari kakonyeneke.

³ Kajenutu, kenyikokis ajenun EJAKAIT: Icasit akelomar kwape katupuruc: Ebuni mamawok kwape kakiru, Kwape kakiru nakiloboet nairwairwai akwap.”

⁴ Wu Epuraim, kekonakini jo ai? Wu Yuda, kekonakini jo ai? Naarai esubit akusijokis bala edou loka atupuruc, Ido kwape akopyo nueokete nape sek.

⁵ Ŋes kajepiata kinabin; Kaar kes kakiro nuka aitukuka: Esubito ikatubesia bala aica naipelun.

⁶ Naarai emiela aitim konye mere asuban; Ka aijen Edeke aitelekarit ainakineta nuieweio.

⁷ Konye adiakasi kesi aitutuket kwape Adam; Kamodata eoŋ kanen,

⁸ Erai Gilead ere loka ŋul kaluiswamaete numam edolito, Eiukitoi aokot.

⁹ Ido kwape idariata ikodeta luka ikaijatak etuŋanan, Eari kwaŋin atukot naka isasedotin korot loebei Sekem: Eebo, eswamata nukasilianut.

¹⁰ Aanyik akirot naasogim okek loka Isirael; Atakanu adoteu koEpuraim, amunaun Isirael.

¹¹ Ka jo da, wu Yuda, kiseikinitai amio.