Kosea 4 - Ebaibuli1 Kiirasi akirot naka EJAKAIT, yes idwe luka Isirael, Naarai ejai EJAKAIT aŋolopa kaluiboiete kakwap, Naarai emamei abeit, karaida aitim, Karaida ajenun Edeke kakwap. 2 Emamei ibore dimarai aiyapo, ka aiŋal, ka aibil ebotet, ka aiar, ka akoko, ka adoteu; Ebelaros, aokot da edolokinete aokot. 3 Kanuka ŋun ibworo akwap, Ekalanyana ninitunanan yeniboie kotoma, Nenipe kitian luka ais ka akweny nuka apak; Eebo, elemario da iboro lukecor. 4 Konye kinyek ituŋanan epeget, Karaida ituŋanan aitoron; Naarai eraas ikonituŋa kwape luitepegete esasedoti. 5 Kiguikini ijo paaran, Iguikini da enabi nepepe kaio kuare; Amudiari da totokon, 6 Emudiaros ikatuŋa kanu amamus aijen: Naarai ibu koner aijen, eoŋ da kaneri jo, Mam iraun esasedoti mamakan; Naarai kimurwokis ikisila luka Edekekon, Eoŋ da kemurwokinete ikonidwe. 7 Kwape epuarotor, kwape kwaŋin adiakanariata kamakaŋ: Elocokini eoŋ da aibusesukec araun ileic. 8 Enyamenenete aronis naka ikaruna, Iranaete numam adolitekec, 9 Aso eriakanara ituŋa ka esasedoti: Eticani kes kanuka iponesiokec, Aropi kes kanuka aswamisiokec. 10 Enyamete, konye mam imonikinos; Edotearos komam ipuaros: Naarai enyekis aibwaikin etau mama ejai EJAKAIT. 11 Adoteu ka ajon ka ajon nukitetiak, Kes elemarete ajenun. 12 Inisete ikatuŋa atorominikec, Ebelakee da elimokini kes: Naarai etapaa kes emoyo loka adoteu, Aloto eporo anyoun kama ‘ejai Edekekec. 13 Einanakinete asuban kaidiasia nuka ironan, Isupuruununete lukisupurununo koukon, Kwap kiluan, ka isiepen ka ipeduro, Naarai ejok itolimonokec. Kanuka ŋun eelos akusipesur, Edote aterakakus. 14 Mam eticani akusipesur eelos, Karaida aterakakus edote: Naarai apaasi kesi ikulepek kanudotea, Einakinete asuban nepepe kakerimok: Ibirorio ituŋa lumam eienere. 15 Karaida iporo ijo Isirael, Kinyek Yuda agwaun akirot; Sirikiloto Giligal, Karaida alosit Bet-aben, Karaida aiyapo ebe, “Kwape ejaria EJAKAIT.” 16 Naarai eninik Isirael, Kwape ataok naeninik: Aso itadaki tope EJAKAIT kes Kwape imerekek kaibois naelal? 17 Imorikikina Epuraim kaputosia, Kinyek ŋes. 18 Edwarak amatanakec: Iporoonoros tiritir: Errinasi noi ikapolokoke ileic. 19 Ekutari ŋes ekwam kabebenokake; Irumete ileic kanuka asuba |
Ateso Old Version Bible © United Bible Societies, 1961.
Bible Society of Uganda