Isaia 8 - Ebaibuli

¹ Kosodi katema EJAKAIT atiar, “Kolem amoru naepol, kigirigir kakwara naka ituŋanan ebe, ‘Naka Maker-salal-kas-bas.’”

² Kadum ikajenak lumunon Aitejenunia, Uria esasedoti, ka Sekaria okoku loka Yeberekia,

³ Kasodi kalot neejai anabi; kopotuu ŋesi, kidou ikoku yenisapat, Kosodi katema EJAKAIT atiar, “Komaik ekekiror Maker-salal-kas-bas.

⁴ Naarai eriŋa ikoku ejenuna aiworo ebe, ‘Papaka’, ka ‘Totoka’, eŋatario abar naka Damasiko, ka luŋaruna luka Samaria kakonyen nuka ekabaka loka Asuria.”

⁵ Kosodi kiyatak EJAKAIT boobo einer keoŋ katema atiar,

⁶ “Naarai aŋeroto ituŋa lu akipi nuka Siloa nueleleete mot, kisiyalamikis da Resin ka okoku loka Remalia;

⁷ aso do koany, eyauni EJAKAIT akipi nuka Ecor, nuegogoŋ nuipu, ŋes ekabaka loka Asuria ka akeibuses kere: ilapanari ŋesi alelesiake kere, ilelebuni oitolimanake kere.

⁸ Ido iyatanakini alel kiton Yuda; ilapanari etubor; edolokini da kiton omurisiŋ; ilelebi aigarar naka abebenokake alalau naka akwapukon, ijo Imanuel.”

⁹ Kocelata, yes atekerin, kibilibilio; Kitoikis aki, yes kere luka akwapin nuelwaka; Koenata aŋabes, kibilibilio; Koenata aŋabes, kibilibilio.

¹⁰ Kinerutu akiro kere nepepe, itapalaunio; Kinerata akirot, mam itogogoŋio: Naarai ejai Edeke kasio,

¹¹ Naarai ener EJAKAIT keoŋ kwaŋin kakan nakagogoŋ, kesisianak kenye alosenen korot loka ituŋa kalu, kobala ebe,

¹² “Sirikinerata yesi ebe, Ainerun naka ebotet, kere nuenerasi ituŋa lu ebe, Ainerun naka ebotet; sirikikuriakaros akeceitukurian, karaida aituburuunio.

¹³ EJAKAIT loka ajoresio, ŋes italaunete yesi; korau ŋesi akusikurian, korau ŋesi akusiburun.

¹⁴ Eraun ŋesi aibois nakalaunan; konye eraun amoru naitiguikinet ka atiiba naka aibirokin mama ejaas ikekia kere luka Isirael, atacit ka eic neejaas luibolete koYerusalem.

¹⁵ Ido itiguikinos luipu, ibiroros, ebilibilio, ipokete eyaŋaario.”

¹⁶ Koen aitejenunet, kipuc da ikisila mama ejaas ikesisiakaka.

¹⁷ Ido edareuni eoŋ EJAKAIT, loibwai akekonyen kama ejai ekek loka Yakob, ido amoi eoŋ ŋes.

¹⁸ Koany, eoŋ ka idwe lukainakinit EJAKAIT kirai aanyuneta, ka nukaumokin koIsirael nuepote kama ejai EJAKAIT loka ajoresio, loiboie komoru Sion.

¹⁹ Arai kitemarete ebe, “Komoata neeŋaas luejaas ajokin ka ikacudak, luididias ka luirurumaete”: mam tiemoata ituŋa Ekecedeke? Ti kereka kemoata kesi lukatwak kanuka lukajarak?

²⁰ Kaboŋutu neejaas ikisila ka aitejenunet! Arai mam inerasi akirot ŋin kwape ejaar, abeit mam iwalakini kes.

²¹ Ido itorete kakwap kokuriaka noi koriebi eteŋei: kosodi kanen, naariebia eteŋei, ekadakinete, ikenete kolimito ekecekabaka ka Edekekec, koŋanyito akecekonyen kuiu:

²² esesenete akwap, ido koany, aburun ka amuton, ka anyoridid naka ariebo; ireŋiario kamuton naejesi ŋaŋ.