Isaia 66 - Ebaibuli

¹ Ebala EJAKAIT kwanata ebe, “Erai akuj ekaicoloŋ, Erai akwap da eicoloŋ loka akejeka: Etogo lonyoin lokidukokinete eoŋ? Aibois nanyoin naeraun akaibworaret?”

² Naarai ebala EJAKAIT ebe, “Akakan ŋes asubi ŋun kere, Aso kwaŋin ejaunos iboro ŋul kere: Konye yen ŋes ituŋanan yenaseseni eoŋ, Ŋin yenitasono, yenikemoyo loitoronikina, Yenemarani kakakirot.

³ “Ikoni loeari emoŋ kwape loeari etuŋanan; Ikoni loeinakini imerekek araun asubanit kwape loebili emurisiŋ loka ekiŋok; Loeinakini ainakinet naka akiria kwape loeinakini aokot nuka epege; Loisupuruuni lukisupurununo, kwape loilipakini aput arereŋ: Eebo, aseutu kesi ikecerotin, Isiyalamikinete ikecetauon italesiakec.

⁴ Aseuni eoŋ da aiticanetakec, etodolikini kes nuekuriaka; Naarai nakeworoo eoŋ, amamei yeniii; Nakeneria, mam epupunito; Konye kiswamata nueroko kakonyeneka, Koseut numam kesiyalamikinito.”

⁵ Kiirasi akirot naka EJAKAIT, yes luimaranete kakekirot: Ebe, “Apotu ikusiinacan lukilaito, Lukireŋearete kanuka ekakiror kotemasi atiar, ‘Kitopolooroi EJAKAIT, tetere kianyuni akusiiyalama’; Konye isurumio kes ileic.

⁶ “Eporoto loka ecelet loebuni kore, Eporoto loebuni koyekalu, Eporoto loka EJAKAIT loetacakini lukasurupoke!

⁷ “Eriŋa ŋes eriebakina, kidou; Eriŋa apipiluke edoluno, kidou ikoku yenisapat.

⁸ Iŋai lem eirarit naikoni nen? Iŋai eanyunit nuikote nen? Eurio teni akwap kapaaran adiopet? Idounio tope ateker katipet? Naarai nepeariebakinor Sion, kidou idweke,

⁹ Ebala EJAKAIT ebe, Etodolikini tope aur komam aisidoun? Ebala Edekekon ebe, Agolokini tope akoik, Eoŋ loesidouni?

¹⁰ “Kiyalamikinos yesi kaYerusalem, kibwoŋata kanukeŋ, Yes kere luiminasi ŋes, Kiyalamikinos kailel nepepe kaŋes, Yes kere luibworosi kanukeŋ,

¹¹ Konakata do ikisin luka aitalakarike; kimonikinos; Kodeŋ noi, kiyalamikinos kaidiles naka aibusesuke.”

¹² Naarai ebala EJAKAIT kwanata ebe, “Koany, etalalari ainapakin kamake kwape ecor, Aibuses da naka atekerin kwape aguurut nailapanar; Inakete yesi, kidakitai yes kosiep, Kilepanario kakuŋin.

¹³ Kwape yenitalakari totoke, Kwape kwaŋin etalakaria eoŋ yes; Kitalakario ko Yerusalem.

¹⁴ Ianyunete, eyalamikinos ikusitauon, Epoloete akusikojo kwape amel: Ejenun akan naka EJAKAIT kama ejaas ikekejaanakinak, Enyunyurikini lukasurupoke.

¹⁵ “Naarai koany, ebuni EJAKAIT kakim, Esubito agalinike kwape etapipirio; Aijaikin anyunyutake kadedeŋ, Airetakinike kalianeta nuka akim.

¹⁶ Naarai etubokini EJAKAIT kakim, Kekekileŋ da, mama ejaas lukawat kere; Ipu da lueari EJAKAIT.

¹⁷ “Ŋul luitalaunos, luesegakinos, alomar omanikoria, atupar ediopet kokidiŋ, luenyamete akiriŋ naka ipegei, ka yeniketal, ka emir: ebala EJAKAIT ebe, Enaŋete kere nepepe.

¹⁸ “Naarai ajeni akeeeswamisio ka aomisiokee: abuni eoŋ atukonokin atekerin kere ka aŋajepa; epote kesi eanyunete akaibuses.

¹⁹ Ebwaikini eoŋ aanyunet kamakec, ejukari iceke kakes luakuete mama ejaas atekerin, Tarusis, Pul ka Lud, luikesete akabwai, Tubal ka Yaban, apujana nuelwaka, lumam epupunito iemutoka, karaida aanyun aibusesuka; elimonokinete akaibuses mama ejaas atekerin,

²⁰ Ebala EJAKAIT ebe, Eyaunete kesi ikusiinacan kere anyoun katekerin kere araut ainakinet mama ejai EJAKAIT, kobalasin, kagalin, kagalin nuimukoritai, kanyubun, kakaalai da, epote oroŋataka lokalaunan Yerusalem, kwape eyauniata idwe luka Isirael ainakinetekec togo loka EJAKAIT, kotoma obore yenelai.”

²¹ Ebala EJAKAIT ebe. “Alemuni ice kakes da araut isasedotin ka Ilebin.”

²² Naarai ebala EJAKAIT ebe, “Kwape esalakinia kakonyeneka Akuj nakitetet ka akwap da nakitetet naasubi, Kwape kwaŋin esalakinia aurikus ka ekusikiror da.”

²³ Kosodi kanen, ebala EJAKAIT ebe, “Ageun kolap ediopet lokelamunan kiton ece, Ido ageun kasabato adiopet kiton ace, Eponenenete lukawat kere aima kakonyeneka.

²⁴ “Elomarete kesi, esesenete atesina kere nuka ituŋa luapaarete kamakaŋ: naarai mam ekurutukec etwani, karaida akecekim mam itudeŋio; eraunos kesi luesaeitai kama kalukawat kere.”