Isaia 65 - Ebaibuli

¹ Abu ketemokino ainiruŋio kama kaŋul lumam keŋisitos; Ketemokino adumunio kama kanul lumam kamootos: Kabala ebe, “Eoŋ lo, Eoŋ lo,” mama ejai ateker namam iwonet ekakiror.

² Ariorit akakanin apaaran kere mama ejaas ituŋa lukepali, Luelosenenete korot lomam ejok, Kwape ejaatar akeceomisio:

³ Ituŋa luketunyunyuranakinete kakonyeneka tiritir, Lueinanakinete asuban omanikoria, Luisupurununete lukisupurununo kamatapalin;

⁴ Luiboikinos atesin, lueperete kuare toma aiboisio nukaiyeiyea; Luenyamete akiriŋ naka epege, Ido acece nuka iboro luketal ejaas toma oborokec.

⁵ Luebalas ebe, “Kobwo bon, Sirikikuny mama ajai, naarai agitara kamakon.” Eraas ŋun apuru okumesika, akim naenoki apaaran kere.

⁶ Koany, iwadikatai kakonyeneka ebe, Ebala EJAKAIT ebe, “Mam eoŋ elilini, Konye atacakini, eebo, atacakini toma atorobusiokec,

⁷ Numam adolitekus, ka numam adolit nuka lukapapaakus, Naarai kisupuruŋunete lukisupurununo koroŋan, Kamoromoroete eoŋ koukon: Kanuka ŋun etemi eoŋ katorobusiokee nuetacakinete aswamisiokec ŋuŋo,”

⁸ Ebala EJAKAIT kwanata ebe, “Kwape edumunor ebino lokitetet kaibuŋet, Ebalai ebe, ‘Sirikimuna, naarai ejai arereŋ tomakeŋ’: Kwape kwaŋin eswamai eoŋ kanuka ikakejaanakinak, Kenyek amudiar kes kere.

⁹ Etolomuni aur kotoma Yakob, ekeruman iroŋanaka koYuda: Irumete luseunaka, ibolenenete ikakejaanakinak kaŋina.

¹⁰ Eraun Saron erony loka isipanin luka amerekekin, Aditot naka Akor da aibois naeuriakiata isipanin luka aituk, Kanuka ikatuŋa lukamootos.

¹¹ Konye yes luijalete EJAKAIT, lukimurwokini ekaroŋat lokalaunan, Luitemokinete Arereŋ emesa, Luilelebikinete Anerokin aderekai ebino loinyalinyalitai;

¹² Anerokin eoŋ yes okileŋ, ikukumete yesi kere earit; Naarai nakeworoo, mam ijito; Nakeneria, mam ipupunito; Konye iswamata nueroko kakonyeneka, Iseut numam kesiyalamikinito.”

¹³ Kanuka ŋun ebala EJAKAIT Edeke kwanata ebe, “Koany, enyamete ikakejaanakinak, Konye yes kiriebi eteŋei: Koany, emasete ikakejaanakinak, Konye yes kijakit akur: Koany, elelete ikakejaanakinak, Konye yes kirumete ileic:

¹⁴ Koany, eyeete ikakejaanakinak kanuka aiyalama naka etau, Konye yes imonyete kanuka aiturur naka etau, Ibwololoete kanuka akadakin naka emoyo.

¹⁵ Inyeinete ekusikiror araun ekenit mama ejaas luseunaka, Kiari EJAKAIT Edeke; Emaikini ikekejaanakinak ekiror ece.

¹⁶ Tetere ŋin yenilipakin bon arereŋ kakwap, Ilipakin bon arereŋ kolimite Edeke loka abeit, Ŋin da yeniyapoi kakwap iyapoi kolimite Edeke loka abeit; Naarai imurwokinete ican lusodit, Ido naarai ibwaitai kakonyeneka.

¹⁷ Naarai koany, asubi akuj nakitetet, ka akwap da nakitetet: Mam nusodit iitunio, karaida alomar toma aomisio.

¹⁸ Konye kiyalamikinos yesi, kolelakis ŋin yenasubi eoŋ ikar kere: Naarai koany, asubi Yerusalem araut eibwoŋ ka iketuŋa da aile.

¹⁹ Ebwoŋakini eoŋ Yerusalem, alelakini ikatuŋa: Mam bobo epupunio eporoto loka aimony akiyo kotomake, Karaida eporoto loka ican

²⁰ Mam bobo ejaun imukeru yenejari apaarasia nuikidioko, Karaida ekimat lomam itodolikinit akepaarasia: Naarai etwani ikoku yenika ikar akwatat, Ikenio da ikadiakaran yenika ikar akwatat.

²¹ Edukete itogoi, iboiete kotoma; Iraete imanikoria luka emusabibu, enyamete da araitokec.

²² Mam edukete kosodete ice aiboi kotoma; Mam iraete, kosodete ice ainyam; Naarai ejaunos apaarasia nuka ikatuŋa kwape apaarasia nuka ekitoi, Ebusete luseunaka elelakinete aswam naka akaninikec.

²³ Mam itaaritos atai, karaida aidoun idwe luetulanario; Naarai eraas kesi aur naka luisirereŋit EJAKAIT, Ka ikecedwe da kakes.

²⁴ Kosodi kanen, eriŋa kes iwoneo, eii eoŋ; Ido eriŋa inera, eirari.”

²⁵ Ebala EJAKAIT ebe, “Edakasi rwaru epeet ka imerekek nepepe, Enyami eŋatuny ariaŋ kwape emoŋ: Apua ŋes eraun inyamat luka emun. Mam isiriebete karaida amudiar koroŋataka kere lokalaunan.”