Isaia 64 - Ebaibuli

¹ Wu okwe, arai kodi ijo akuj, arai kijesun ijo, Kosodete iroŋan amaran kakonyenekon;

² Kwape inepunia akim kakito, Isiwalaria da akim akipi; Aitejenikin lukasurupokon ekonikiror, Kosodete atekerin amaran kakonyenekon.

³ Nakiswamaa ijo kolo nusogim numam sio kimunonena, Ibu kijesun, komaranata da iroŋan kakonyenekon.

⁴ Naarai ageun apeŋo mam ituŋa apotu kopuputu, karaida abiun kakit, Karaida akoŋu aanyun Edeke dimarai ijo, Loiswamakini ŋin yenidaret ŋes.

⁵ Iriamakinos ijo kaŋin yenisiyalamikinit aswam adolit, Ŋul lukiitunete jo korotinikon: Koany, ibu konyunyura, sio da kadiakanasi: Kiboienenei kaŋin ameun apeŋo, kipedori kereka isio aitajario?

⁶ Naarai kiraun isio kwape yenimam elai, Adolitekosi kere esubit bala anapito naamodok: Kirinyori isio kere kwape akiot; Numam adolitekosi kiyaŋaasi isio kwape kekwam.

⁷ Emamei yeniwonei ekonikiror, Yenimuket bon aikamun jo: Naarai ibwa ijo akonikonyen kamakosi, Ibu kijaik sio akan naka numam adolitekosi.

⁸ Konye do, wu EJAKAIT, irai ijo papakosi; Kirai isio elupe, ijo ekajeanikosi; Kirai isio kere aswam naka akanikon.

⁹ Sirikinyunyurikin noi noi, wu EJAKAIT, Karaida akiitun numam adolit ikar kere: Koany, kosesen, kiŋaiŋait, kirai isio kere ikonituŋa.

¹⁰ Araut ireriakon lukalaunak ais, Araun Sion ais, Yerusalem da asilio.

¹¹ Ekositogo lokalaunan lokajokan, Nekiituritotor kolo jo lukapapaakosi, anyam akim; Ecanicanunos da ikosiboro kere lukisiyalamikinito.

¹² Itikokin tope kakiro kaŋun, wu EJAKAIT? Ililiŋikini ca ka aitiean sio noi noi?