Isaia 61 - Ebaibuli

¹ Ejai Emoyo loka EJAKAIT Edeke kaeoŋ; Naarai kenyonyoiki EJAKAIT eoŋ akinyet Alimonokin luitasonos akiro nukajokak; Kejuku eoŋ aider luebilil itauon, Alimonokin lueŋasitai aosikinio, Ka lueenen da alacakinio;

² Alimor da ekaru loecamunitai loka EJAKAIT, Ka apaaran naka Edekewok naka enyaŋit; Aitalakaar da luibworos kere;

³ Ainakin kes aboko aibois naka ekurwon, Akinyet naka aiyalama aibois naka akuudian; Anapito naka aiturit aibois naka etau loekadakinit; Tetere emaikinio ikito luka adolit, Lukirai EJAKAIT, tetere itubusikinio ŋes,

⁴ Edukete ijeburo, ipopounete nekolo enyeinete, Itemonokinete ireria luiswapitos, ljeburo luka aturio nuipu.

⁵ Ido ebwoete imo kitadakete isipaninikus, Eraunete ipejok ikakoriokokus, Iketitak imusabibunukus.

⁶ Konye yes kinyarao isasedotin luka EJAKAIT: Kinyaraete yes ituŋa ikejaanakinak luka Edekewok: Inyamete abar naka atekerin, Toma aibusesukec ŋes iwogatar.

⁷ Aibois naka ileicikus idumunete irwan aarei; Aibois da naka aitirira isiyalamikinete ewaikec: Kanuka ŋun irumete irwan aarei kakwapukec: Ejaunos kailel namam edaun.

⁸ Naarai eoŋ EJAKAIT amina etube, alait akoko ka numam adolit; Ainakini kes eropitikec kabeit. Etutuki aitutuket namam edaun kakes.

⁹ Ejen aurikec kotoma atekerin, Idwekec da kotoma otuŋa: Ecamunete kere lueanyunete kes Ebe eraas kesi aur naisirereŋit EJAKAIT.

¹⁰ Eyalamikini noi toma EJAKAIT, Elelakini akaijar Ekadeke; Naarai ketanap inapen luka aitajar, Kemukok ŋesi eoŋ ekaso loka adolit, Kwape isirio eteran aboko, Kwape iyogogoo ateran kiboroke luka akais.

¹¹ Naarai kwape itolomuniata alup ikabwaŋunanike, Ido kwape isibwaŋunia emanikor ikinyom lueyeitai toma; Kwape kwaŋin isibwaŋunia EJAKAIT Edeke adolit ka aiturio Kakonyen nuka atekerin kere.