Isaia 58 - Ebaibuli

¹ “Kikalal noi, sirikipala, kikeu eporotokon kwape arupepe, Kolimok ikatuŋa akecediakar, Ka ekek loka Yakob akeceronisio.

² Konye komoenenete eoŋ ŋinipaaran, Iyalamas ajenun ikarotin: Kwape ateker nakiswamaenenei nuedolito, Komam ejalete aicorakinet naka Edekekec, Kelipete eoŋ aicorakineta nukadolit, Iyalamas aikunyakin Edeke.

³ Kineras atiar, ‘Kanukinyo kiluŋenenaa, komam jo ianyuni? Kanukinyo kitieanenenaa akosiijar, komam jo ibwaikinit etau?’ Koany, kapaaran naka ailuŋukus ŋes ianyuniata akusiiyalama, Koyaito da ikusikeswamak kere kagogoŋ,

⁴ Koany, iluŋete kanuka eŋuŋet ka epeget, Ka aidip da kakan naka aronis: Mam iluŋete lolo kanuka aisiirar ikusiporotoi kuju.

⁵ Ikoni tope kwaŋin ailuŋ naabu eoŋ kaseu? Apaaran naiticania ituŋanan akeijar? Ŋes tope aitulur akekou kwape amusala, Ka aipet epuko ka ekurwon? Ŋin tope ŋes kinyarit ailuŋ, Ka apaaran da naitojokit EJAKAIT?

⁶ “Mere na ailuŋ naabu kaseu? Aijarijar aeneta nuka aronis, Alacar arukan naka eloit, Aosikin luereitai, Ibilata yesi ŋoliloit?

⁷ Mere akorakin inyamatakon yeniketeŋei? Ka aisukunyun togokon yenikican yenireŋetai? Kiany yenimujalal, kitanap; Ido sirikiŋopik akonikuan alopet?

⁸ Ŋes konyet ecilar akoniica kwape ecilar kide, Kisunya akoniŋaleun atakanun: Kiŋarenikini akonidolit: Kitupakini aibuses naka EJAKAIT,

⁹ Kosodi iwonei, eboŋokin EJAKAIT: Iworoi, ŋes da iii ebe, Eoŋ lo. Arai kilema eloit kokidiŋikon, Ka aidod kebokorit, einer da nueroko;

¹⁰ Bobo da arai kipalik akoniijar yeniketeŋei, Kisimonik aijar naiticanitai; Kosodi aicakon alomun kamuton, Esubi awariwarakon bala paaran:

¹¹ Kiŋarenikini jo EJAKAIT tiritir, Isimoni aijarakon kaiboisio nueokito, Itogogoŋi da akonikojo; Iraun ijo bala imanikor yenicocoo, Ido bala akoŋu naka atan, namam iŋoŋar.

¹² Edukete bobo lukon aiboisio nukejalakinitai kolo; Ikeuni apeteta nuka aturio nuipu; Kinyaritai Eketetean neetiyanara, Ekenyakanakinan irotin lukibois.

¹³ “Arai kibelok akonikeju anyoun kasabato, Komam iswamaenenei nuitojokit ijo kapaaranika nakalaunan; Kinyara asabato aiyalama, Nakalaunan naka EJAKAIT, naeyoŋitai; Kitubusik ŋes komam Itupanari ikonirotin, Karaida amoot nuitojokit ijo, karaida ailabilab:

¹⁴ Kosodi konyet isiyalamikin kotoma EJAKAIT; Eoŋ da ketodokari aiboisio nuimukururas nuka akwap, Ketanyami airumet naka Yakob papakon: Naarai ener ŋun aituk naka EJAKAIT.”