Isaia 48 - Ebaibuli

¹ Kiirasi yesi nu, yes lukokek loka Yakob, Luenyaritai ekiror loka Isirael, Lualomut kakipi nuka Yuda; Luiyapoete kolimito ekiror loka EJAKAIT, Luelimorete Edeke loka Isirael, Konye mere kabeit, karaida kadolit.

² Naarai inyarakina lukore lokalaunan, Igoŋakina mama ejai Edeke loka Isirael; EJAKAIT loka ajoresio ŋes ekekiror.

³ “Alimo akiro nusodit ageun kasonya; Eebo, kolomut kaitukuka, ketodia kes: Keswama kes katipet, kodoloto.

⁴ Naarai abu kajen ebe ininik ijo, Ekonimurisiŋ ŋes esilot lokasuat, Ereetekon aisinit;

⁵ Ŋes kalimokinia jo ageun kasonya; Ketodik jo eriŋa kedolo: Kinyek ijo atemar atiar, ‘Akaput ŋes eswamat ŋun, Ecorakis ŋun akaput naegerer ka akaput naicalara.’

⁶ Ibu kopup ŋun; koanyutu ŋun kere; Mam yes kilimokinete? Ketodik jo akiro nukitetiak ageun kapak kana, Akiro nuibwaitai numam ijenunit,

⁷ Esubunitai kwape kwana, mere ageun kasonya;- Kiton lolo mam lem ipupunit kes; Kinyek atemar atiar, ‘Koany, ajeni kes kolo.’

⁸ Eebo, mam ibu kopup; eebo, mam ibu kojen; Eebo, ageun kasonya mam epukoro akonikit: Naarai abu kajen ebe iswama noi kaimod, Kinyaritai ekapaaran ageun kakoik,

⁹ Kanuka ekirorika etilori akanyunyura, Kanuka akaiturio etikokini kamakon, Kenyek amudiar jo.

¹⁰ Koany, keliliau jo, konye mere kwape epuesa; Kegimo jo koupa loka aiticanitoi,

¹¹ Kanukaŋ teni, kanukaŋ, eswamai eoŋ ŋun; Naarai ikwaikini ai ekakiror itisilio? Mam ainakini ice akaibuses.

¹² Kiirarai, wu Yakob, ka Isirael lonyaraunaka; Eoŋ ŋopeŋol, Arai eoŋ losodit, ido arai lokawasia.

¹³ Eebo, epesikinit akakan apeteta nuka akwap, Eterakinit akakan nakoteten akuj: Arai kanyarau kes, ebwoete nepepe.

¹⁴ Kotukonokinos, yes kere, kopuputu; Iŋai bo kakesi elimorit ŋun? Emina EJAKAIT ŋes: Iswamakini ŋesi Babulon nuitojokit, Akekan da esurokini Ikaludean.

¹⁵ Eoŋ, eoŋ obe, ener; eebo, anyarau ŋes: Kayau ŋes, ido ekerianar korotoke.

¹⁶ Kikunyutu neajai, kopuputu nu; Ameun kageunet mam abu kener kaiyeiyea; Ageun kapak naajaar, ajai eoŋ.” Ido kwape kwana ejuku EJAKAIT eoŋ ka Emoyoke.

¹⁷ Ebala kwanata EJAKAIT, Ekalakunanikon, Lokalaunan loka Isirael ebe: “Arai eoŋ EJAKAIT Ekonideke, Lokisisianakini jo aimeda, Lokiŋarenikini jo korot lotikilosio.

¹⁸ Wu okwe, tikiirasi aicorakinetaka! Ŋes konyet esubia ainapakinikon kwape ecor, Akonidolit da kwape akailan nuka aŋolol,

¹⁹ Ido esubi aurikon kwape asiŋe, Idwe luka akoikikon kwape kapuake: Ekekiror mam ti egelario karaida amudiario kakonyeneka,

²⁰ Kolomasi koBabulon, kokera kama ejaas Ikaludean; Kitodiasi keporoto loka ayoore, kolimokis, Kinerasi kiton osaŋe loka akwap: Kobalas ebe, “Alaku EJAKAIT ekekejaanakinan Yakob.”

²¹ Mam kes ajakit akur nakiŋarenikinio kes kamodiŋo; Kisileleu akipi katiba kanukec: Kodi atiiba da, kilepunos akip.

²² Ebala EJAKAIT ebe, “Emamei ainapakin kaneejaas ikaronok.”