Isaia 44 - Ebaibuli

¹ “Konye kwana kiira, wu Yakob ekakejaanakinan; Ka Isirael loaseunit.

² Ebala kwanata EJAKAIT lokisubi, Lokiluŋuluŋi jo ameun kakoik, lokiŋarakini ebe; Sirikikurianar, wu Yakob ekakejaanakinan; Ka jo da, Yesurun, loaseunit.

³ Naarai abukokini akipi ŋin yenejakit akure, Aguuruto da akwap naconit: Abukokini ekamoyo akoniwur, Arereŋuka da odwekon:

⁴ Elibunete kwape anya, Kwape ikito kama eleleata akip.

⁵ Ebala ediopet ebe, ‘Arai eoŋ loka EJAKAIT’; Ece da emaikini bon ekiror loka Yakob; Ece da iwadikakini akanike ebe, ‘Loka EJAKAIT: Emaikini bon ekiror loka Isirael.”

⁶ Inera kwanata EJAKAIT, Ekabaka loka Isirael, Ekalakunanike da, EJAKAIT loka ajoresio: Ebe: Arai eoŋ losodit, arai lokawasia da; Kwabo emamei ecedeke dimarai eoŋ.

⁷ Iŋai bo eputos keoŋ? Kolimo do, Kitejen kitemonok kaŋukan. Iŋai bo elimorit apeŋo akiro nuepote? Kitejenut ŋun nuejaunete rwaru,

⁸ Sirikiyoŋa, karaida akurianar: Mam apeŋo kalimonokini jo ka aitodianakin? Iraas yesi da ikakajenak. Ejai Edeke ece dimarai eoŋ? Eebo, emamei Atiiba; mam eoŋ ajeni adio da.”

⁹ Ŋul luesubete aput naegerer eraas kere aamameak; emamei ameda kotoma oborokec luisiyalamikinete: ikajenakakec da mam eanyunete karaida ajenun; tetere irumete ileic.

¹⁰ Iŋai bo asubi edeke, arai kecalari aput naetatao naemamei ameda?

¹¹ Koany, irumete ileic ipaupake kere; ikasubak da eraas ituŋa: kotukonokinai kere nepepe, kobwaata; ekuriakaros, irumete kere ileic.

¹² Etatai ekatatan aep, iswamai toma atotol, iluŋuluŋi kanyulia, esubi kakekan nakagogoŋ: eebo, eriebi eteŋei, emameun agogoŋuke; mam emasi akipi, iilor.

¹³ Itemi ekekeon ekokoro; igiri kekalamu; esonyi kesonyet, itemi kaitemisio, ituputoori kwape aput naka ituŋanan, kwape ejaar atemelel naka ituŋanan, aiboi kotogoke.

¹⁴ Ejepi iresia, eyaŋaari da etekwa ka elua, itogogoŋi kanukeŋ ediopet kokito luka amagoro: eraikini eberos, itani akiru.

¹⁵ Kosodi konyet araun akito nuka ituŋanan; elemuni ipieri; eebo, inoki, ipoio inyamat: eebo, esubunia edeke, emai ŋes; esubunia aput na’ gerer, ekukonokini kakonyeneke.

¹⁶ Icwei ŋesi atutubet kakim; atutubet ŋipeŋin ŋes enyamia akiriŋ; epei nupeon, imonikin: eebo, ipieri, kobala ebe, “Bu, amwanu eoŋ, aany akim.”

¹⁷ Nuesalito esubunia edeke, aputoke naegerer; ekukonokini ŋes emai da, ilipi ŋes, kobala ebe, “Koyuunai; naarai irai ijo ekadeke.”

¹⁸ Mam ejenete, karaida aomoom: naarai etumudak ŋesi akecekonye, tetere mam epedorete aanyun; ikecetauon da tetere mam epedorete ajenun.

¹⁹ Emamei da yeniituni, emamei da aijen karaida amisiikin atemar ebe, “Ecweik eoŋ atutubet kakim; eebo, epoo atap katotoleke; ape akiriŋ, kanyam da; asubunia teni nuesalito ibore yeniketal? Akukonokini kereka apuŋure naka ekitoi?”

²⁰ Enyami ŋesi ekurwon: etapaa etau loeŋalatai tetere mam epedori ayuun eketau, karaida atemar atiar, “Mere ejai aiŋal akanika nakoteten?”

²¹ Kiitu akiro nu, wu Yakob; Ka Isirael da, naarai irai ijo ekakejaanakinan; Eoŋ keluŋuluŋuni; irai ijo ekakejaanakinan; Wu Isirael, mam eoŋ kemurwokini jo.

²² Amwata adiakanaretakon kwape edou loejamijami, Aronisiokon da kwape elisina: Koboŋu neajai; naarai kalaku jo.

²³ Koye, ijo akuj, naarai eswama EJAKAIT; Kikareoto yes atutubeta nukokwap nuka akwap; Kogeut ayoore, yes iroŋan, ljo amagoro, ka ŋolikitoi kotomake; Naarai alaku EJAKAIT Yakob, Itopolooritai koIsirael.

²⁴ Ebala kwanata EJAKAIT, ekalakunanikon, Ŋol lokiluŋuluŋi jo ameun kakoik ebe: “Arai eoŋ EJAKAIT, loasubi kere; Loapesit bon akuj; loaterarit akwap; Iŋai ca ejai keoŋ?

²⁵ Loerebokini aanyuneta nuka ikeŋalak, Esikerepikini ikaroak; Loetoboŋori lukacoa kau, Loesibanibani akeeeijen:

²⁶ Loetogogoŋi akirot naka ekakeiaanakinan, Etodoli da ainerun naka ikiyakiaka; Loenera nuka Yerusalem ebe, ‘Edumuni luiboikinos toma’; Nuka ireria luka Yuda da ebe, ‘Edukio, Eoŋ da etonyouni aiboisiokec nuiswapito’:

²⁷ Loalimokini ataro ebe, ‘Koono, Eoŋ da etooni icorinikon’;

²⁸ Loenera nuka Kuro ebe, ‘Ŋes ekakecokon, Itodoli ŋes! kere nuakoto eoŋ’; Enera da nuka Yerusalem ebe, ‘Edukio’; Nuka eyekalu da ebe, ‘Epesio akonipeteta.’’’