Isaia 42 - Ebaibuli

¹ Koany ekakejaanakinan, loegaŋit; Eseunaka, loisiyalamikinit akaijar; Epiik emoyoka tomake; Itodiari rwaru etube neejaas imo.

² Mam iworoi, karaida elulu, Karaida aisiirar ekeporoto korot.

³ Mam ebili egada loiriecakina, Karaida aitudeŋ eusi loepuriei; Itodiari etube kotoma abeit.

⁴ Mam esiliori karaida ajuruŋuŋ Aitodol neibwaikinia etube toma akwap; Idarete da apujana ikekisila.

⁵ Inera kwanata Edeke EJAKAIT, ŋol lokolo asubi akuj, kopesia; Kotera akwap ka luelomunete kotomake; Loeinakini ituŋa luejaas tomake eiyeŋane, Ka emoyo da luelosenenete kanen ebe:

⁶ “Eoŋ EJAKAIT abu kanyarau jo kotoma adolit, Ketiŋenenei jo akonikan, kedarenenei jo, Kebwaik araun aitutuket naka ituŋa, aica da naka imo:

⁷ Aitwekenyun akonye numudukiok, Alemun lueenitai kaipany, Ka ŋul da luibolete kamuton kotogo loka aenis.

⁸ Arai eoŋ EJAKAIT: ŋopeŋol ekakiror; Mam ainakini ice akaibuses, Karaida akaiturio mama ejaas aputosia nuegerer.

⁹ Koany, adolut nuageete, alimonokin nukitetiak; Kalimonokinete kes eroko etakanuna.”

¹⁰ Koyeikis EJAKAIT ekosio lokitetet, Ka akeiturit da ageun kosaŋe loka akwap; Yes luijesaros aŋolol, ka luejaas tomake kere, Ka apujana, ka ŋul da luiboietc kotoma.

¹¹ Kikalalata amodiŋ ka ireria lukapolok luejaas toma, Ireria neibolo Kedar; Koyeikis luibojete kotoma Sela, Kikalalaete kaidiasia nuka iroŋan.

¹² Koinakis EJAKAIT aibuses, Ido kolimonokis akeiturit kapujana.

¹³ Elomuni rwaru EJAKAIT kwape ekagogoŋon; Isidiki adunyanut kwape ekajion; Iworoi, eebo ikalalai; Iswamakini lukasurupoke nukagogoŋ,

¹⁴ Abu keliliŋ ape; kapala, kaŋirik; Natikwana amonyi bala aberu naeriebi aidoun; Kenyikonokin keyeŋanakin da.

¹⁵ Etisili rwaru iroŋan ka iukon, Etirinyoori da luebwaŋete kere kotomakec; Etuluori icorin apujana, etooni da ataparin.

¹⁶ Ayauni imudukiok korot loeolito; Etotori kes osokono lueolito; Esicauni amuton kakonyenekec, Etenari da aiboisio nuekudukudo. Asubi ŋun, kwabo mam enyeini kes,

¹⁷ Inyakario, ilcieikinete noi luemunosi aputosia nuegerer, Luelimokinete aputosia nuecalara ebe, “Iraas yesi ikosidekesio.”

¹⁸ Kiirasi, yes ikimiŋiok; Kosesenete, yes imudukiok, tetere ianyunete.

¹⁹ Iŋai bo emuduki, dimarai ekakejaanakinan? Arai bo iŋai ekimiŋ, kwape ekakiyakia loejukari? Iŋai bo emuduki kwape ŋol loagitunit, Arai bo emuduki kwape ekejaanakinan loka EJAKAIT?

²⁰ Itei ijo akiro nuipu, konye mam ianyuni kes; Epukoro akeki, konye mam epupi.

²¹ Itojokit EJAKAIT aitopoloor ekisil, Kaitubusikin da, kanuka adoliteke.

²² Konye lu kes ituŋa lueruruoritai, lukenataritai; Elokitai kes kere kapanya; itoŋopitai kaidarisia: Eraas lumejan, emamei yeneyuuni; Lunatan, emamei yenetemari atiar, “Kinyak.”

²³ Iŋai bo kayesi loitoikini akit ŋun? Loepupuni loeirari da nuka apak naebunit?

²⁴ Iŋai bo ejaikinit Yakob aŋatario, Isirael da ikeruruok? Mere EJAKAIT? Lokipou kadiakasi kamakeŋ, Koŋeroto kesi alosit korotinike, Mam kerimarito ikisilake.

²⁵ Kanuka ŋun kobukoki ŋes aresiar naka anyunyurake, Ka agogoŋ da naka ejie; Kisinepik ŋes akim airimor, komam ŋes ejeni; Konomo ŋes, konye mam kibwaikinit etau.