Isaia 4 - Ebaibuli

¹ Ido kapaaran kaŋin ikamunete aŋor akanykaarei ekiliokit ediopet, koba lasi ebe, “Kinyamenenei isio inyamatakosi, kinapenenei da inapene kosi: konye kisiikinai konyarai sio ekonikiror; kolema ijo amorositikosi.”

² Kapaaran kaŋin eraun atenut naka EJAKAIT naejok ido nakaibuses, eraunos da araito nuka akwap nukeitur nuejijimikinete ŋul luekuito luka Isirael.

³ Kosodi kanen, ŋol loideuna koSion, ka ŋol loesalakinit Yerusalem enyarao lokalaunan, ŋes ŋinituŋanan yeniwadikatai araut yenikajaran koYerusalem:

⁴ naedaunia EJAKAIT ailotar amodokok kere naka apesur nuka Sion, aitesegar da aokot nuka Yerusalem kokidiŋike, kanuka emoyo loka etube, ido kanuka emoyo loka aicwe.

⁵ Ido esubakini EJAKAIT ŋolitogo kere loka emoru Sion ka atukonokinetake, edou ka apuru paaran, ka aica naka akim naesarani kuare: naarai eterakini eiswapet aibuses kere.

⁶ Ejaun da ewema araun etolim lokapaaran kanuka aibuse, amecis ka aŋopis kanuka akako ka akiru.