Isaia 35 - Ebaibuli

¹ Eyalamikin ais ka aibois naelarioŋoŋ; Eleli amodiŋ, ituroi kwape apecel,

² Ituroi noi, eleli kaitac ka ayoore; Einakinio aibuses naka Lebanon, Ajokis naka Karumel ka Saron: Eanyunete aibuses naka EJAKAIT, Ajokis naka Edekewok naitelekarit,

³ Kitogogoŋoto yesi akanin nuekalanyaka, Kitogogoŋoto da akuŋin nuilejekekas.

⁴ Kolimokis ŋul luejaas itauon luekuriaka ebe, “Kogogoŋoros, sirikikuriakaros: Koany, ebuni Ekusideke kenyaŋit, kaitepesen naka Edeke; Ebuni ŋesi, kitajar yes.”

⁵ Kosodete akonye nuka imudukiok akwenyun, Epukorio aki nuka imajiŋa.

⁶ Kosodi eŋwalas asomanar kwape amiam, Eyei aŋajep naka ebaŋ: Naarai ibulubulete akip kais, Aguuruto da kamodiŋ,

⁷ Eraun asiŋe naemwekimweki abwal, Alup da nuejakit akur akonye nuka icowai: Kaibois naka ikuwei, neaperenenete, Ejaunos anya kagadai ka abiloi.

⁸ Ejaun da erot lokapolon kaŋina, erot, Emaikinio Erot loka alaunit; Lumam elaete mam itorete nen; Konye eraun loka kwi ikalotok, Eebo, ibaŋiok mam epaarete nen.

⁹ Emameun eŋatuny kaŋina, Karaida ediotiaŋ loemudiari mam itori nen, Mam edumunos kaŋina; Konye esakasakaete luelakunitai korot kaŋol.

¹⁰ Eboŋunete lugweluna luka EJAKAIT, Epote Sion eyeete: Ejaun ailel namam edaun akwesikec: Edumunete aiyalama ka ailel, Ilicaros aiturur ka eidiny.