Isaia 27 - Ebaibuli

¹ Kapaaran kaya itepeseni EJAKAIT Lebiatan (etiaŋ loeiliili loka aŋolol), emun loetirono, Lebiatan emun loekudukudo, kekekileŋ loeninik, loepol loegogoŋ; eari da apiu naejai aŋolol.

² Kapaaran ka ya ebe: “Amana naka emusabibu naejok, koyeikis ŋes.

³ Eoŋ EJAKAIT aricit ŋes; Ecocoenenei ŋinipak; Aricenenei akuare ka apaaran, Kinyek idiotuŋanan aicanican ŋes.

⁴ Emamei eoŋ anyunyura: Arai kaasurokis eoŋ ikodokodo ka ikukwa kojie! Tikedenyak kes, ti kecweik kes.

⁵ Arai bo kikam ŋesi akagogoŋ, Kenapakinos keoŋ; Eebo, kenapakinos keoŋ.”

⁶ Kapaarasia nuepote iremori Yakob akelias kwap; Ituroi Isirael ibutuni: Ilelebi akwap kere karaito.

⁷ Inomit kereka ŋes kwape inomitor ŋul lukinomete ŋes? Arai bo eario ŋes kwape earere ŋul luabu ŋesi koar?

⁸ Kaitemis, kanuka aireŋear, iŋolopas kaŋes; Kokuta kakutunike naededeŋ kapaaran naka ekwamuke lokokide.

⁹ Kanuka ŋun, ŋes elucere numam adolit nuka Yakob, Nu da kes araito nuka alemar akeronis; Arai kitupusi amor kere nuka etem kwape enon loidecideeitai, Tetere mam bobo Aserim ka aputosia nuka akoloŋ esipokina.

¹⁰ Naarai esil ere loebwaitai, Aibois naasilior, naejalakinitai, kwape amodiŋ: Edak itaok kaŋina, Euriaki da kaŋina, enyamenenei atenunake.

¹¹ Arai kerinyosi atenunake, ebilibilio; Epote aŋor, inokete kes. Naarai erai ateker namam ejeŋl; Kanuka ŋun mam ŋol loasubi kes itimi kes, Ŋol Iokiluŋiluŋi kes mam itodikini kes asianut.

¹² Kosodi kanen kapaaran kaŋin, icomi EJAKAIT anyoun kakalele naka Ecor kiton aguurut nako Misiri, kitukonokinio yes idiopet idiopet, yes idwe luka Isirael.

¹³ Kosodi kanen kapaaran kaŋin, ekutakinio arupepe naepol; epote ŋul lueoliorito akwap naka Asuria, ŋul da luaponi kireŋearai akwap nako Misiri; emaete EJAKAIT koroŋat lokalaunan koYerusalem.