Isaia 24 - Ebaibuli

¹ Koany, ikokoori EJAKAIT akwap, itwasapi, ebuburiari, Itisiarikini da lulbojete kotoma,

² Ido ikote nen, kwape ejauniata ituŋa, ikoni nen esasedoti da; Kwape ejaunia ebulesit, ikoni nen ejakaitike da; Kwape ejaunia akejaanakinan, ikoni nen ajakaitike da; Kwape ejaunia ekagwelunan, ikoni nen ekagwelaran da; Kwape ejaunia ekayuunan, ikoni nen eyuuna da; Kwape ejaunia ekejaikinan kanuka ameda, ikoni nen ekejaaran kanuka ameda da.

³ Itisilio akwap lio, eŋatario da cut; Naarai ener EJAKAIT akirot ŋin.

⁴ Ibworos alup eoliorete da, Ekalanyanar akwap eoliori da, Ekalanyakaros lukapolok luka akwap.

⁵ Emunar da akwap kama ejaas luibolete kotoma; Naarai abilata ikisila, elocokis aicorakinet, Abilata aitutuket namam edaun.

⁶ Kanuka ŋun apia ekenit akwap, Egwaunitos luibolete kotoma akirot: Kanuka ŋun ameo akim luibolete kotoma akwap, Asalata ituŋa luikidioko.

⁷ Ibworoi ebino lowinyiwiny, Ekalanyanar emusabibu, Idinyasi luelakara kotauon kere.

⁸ Iŋoŋoor ailel naka isiman, Ililiŋi ecelet loka ŋul kaluibwoŋas, Edaun aiyalama naka adeudeu.

⁹ Mam emasete ebino kikosiete; Edwarikinete nuitemerete ŋul luemasete.

¹⁰ Etiyakin ere loka ainyalinyal: Egolol ŋolitogo kinyek ituŋanan alomar.

¹¹ Ejai aimony korotin kanuka ebino; Itumutonorio ailel kere, Ilicar akiena kere naka akwap,

¹² Esali asilio bon kore, Inomonomoo ekek ka amudiar.

¹³ Naarai ikoni nen kokidiŋ kakwap mama ejaas ituŋa, Kwape ijaŋijaŋia eseituni, Kwape nueleleŋio nuka emusabibu kedaun aisak.

¹⁴ Ikearete ŋul ikeceporotoi, ibwoŋas; Iworooete ejaas aŋolol kanuka apolou naka EJAKAIT.

¹⁵ Aso kitopolosi yesi EJAKAIT kokide, Ekiror loka EJAKAIT, Edeke loka Isirael, Kapuiana nuka aŋolol,

¹⁶ Kipou kapuput ikososio luapote kosaŋeta luka akwap, Aibuses mama ejaas ikadolitok Konye kabala ebe, “Edokororiari, Edokororiari, itukwi eoŋ! Eswamata ikamodak nukamodomod; Eebo, eswamata ikamodak nukamodomod cut.”

¹⁷ Akurian, ka aipany, ka atacit ejaas mamakon, ljo loiboie kakwap.

¹⁸ Kosodi kanen, ŋol loekeri ecelet loka akurian ibirokin aipany; Ŋol da loelomuni kokidiŋ kaipany ipoki atacit; Naarai eŋaaritai apedon nukokuju, Ijaŋijaŋas apeteta nuka akwap.

¹⁹ Ebilil akwap mweny, Ebaunit akwap demedem, Ijaŋijaŋa akwap noi.

²⁰ Igetanar akwap kwape ekameran, Ijaŋijaŋa epuai kepuai kwape eidukuru; Elaŋirikini ŋes aijerukanutuke, Ibirori, mam bobo enyouni.

²¹ Kosodi kanen kapaaran kaŋin iticani EJAKAIT ajore naka lukapolok lukokuju, Ikabakan da luka akwap kakwap.

²² Etukonokinio kes, kwape etukonokinere ienan kaipany, Egolokinio kaidaris, Akaulo naka apaarasia nuipu, iticanio.

²³ Kosodi konyet elap aitirir, Kiruma akoloŋ ileic; Naarai irumi EJAKAIT loka ajoresio komoru Sion, ka Yerusalem, Ejaun da aibuses kakonyen nuka imakioke.