Isaia 12 - Ebaibuli

¹ Kapaaran kaŋin itemari ebe, “Kemalai jo, wu EJAKAIT; Naarai karaida ibu konyunyurik eoŋ, Ebelokin akoninyunyura, Ido kitalaka eoŋ,

² Koany, Edeke ŋes akaitajario; Amunoneno, komam akurianar: Naarai EJAKAIT YAWB ŋes akagogoŋ ka ekakosio; Ido araun ŋesi akaitajario.”

³ Kanuka ŋun ŋes iriseneneoto akipi kaiyalama kotoma atanin nuka aitajario.

⁴ Kapaaran kaŋin itemarete ebe, “Kimalata EJAKAIT, kiwoneoto ekekiror, Kitejenikis atekerin akeswamisio, Kolimonokis ebe itopolooritai ekekiror.

⁵ “Koyeikis EJAKAIT; naarai eswama nuka aibuses: Kojenunai ŋun kakwapin kere.

⁶ Kibwoŋ, kikare, ijo yeniboie koSion: Naarai epol Lokalaunan loka Isirael kokidinikon.”