Isaia 11 - Ebaibuli

¹ Ido elomuni alibunet katorom naka Yese, Atenut da naelomuni kaliasioke erai araito.

² Iboie Emoyo loka EJAKAIT kaŋes, Emoyo loka acoa ka ajenun, Emoyo loka ainerun ka agogoŋ, Emoyo loka aijen ka ayoŋit EJAKAIT;

³ Isiyalamikinit ayoŋit EJAKAIT. Mam etubokini kwape eanyuniata akekonye, Karaida aitoron kwape epupioto akeki:

⁴ Konye etubokini lukican kadolit, Itoroni kaitenara luitasonos kakwap: Inomi akwap kebela loka aitukuke, Eari ikaronon keiyeŋane loka aitukuke.

⁵ Adolit ŋes aenet naka aŋabeteke, Amunonut da ŋes aenet naka iŋeretenyake.

⁶ Iboie epeet kimerekek yenididi, Eperi erisa kikalol; Itaok ka ikoku yenika eŋatuny ka yenetumit nepepe; Iŋarenikini kes ikoku yenididi.

⁷ Edakas aiteŋ ka adubu; Eperete ludidikikec nepepe: Enyami eŋatuny inya kwape kemoŋ,

⁸ Eboliai ikoku yenenaki kaipany naka asigirikoloŋ, Ikoku da yenejakarit ibwaikini akekan akai naka ekiriton.

⁹ Mam isiriebete karaida amudiar koroŋataka kere lokalaunan: Naarai ilelebun akwap aijen EJAKAIT Kwape kakipi nuerapiarito aŋolol.

¹⁰ Kosodi kanen kapaaran kaŋin, ebwoi atorom naka Yese, araun emedera loka atekerin, emoenenete atekerin neejai ŋol; eraun akeibois naibworaria nakaibuses.

¹¹ Kosodi kanen kapaaran kaŋin, eriori bobo EJAKAIT akekan irwan nakiareit ainyakunia aatoŋot naka ituŋake lukideunos, anyoun koAsuria, ka Misiri, ka Paturos, ka Kus, ka Elam, ka Sinar, ka Kamat, ka apujana da nuka aŋolol.

¹² Esipokini ŋesi emedera katekerin, Etukonokini luereŋetai koIsirael, Kosodi ayaŋaun luesiarisiaritai koYuda, Anyoun kagoria aoŋon nuka akwap.

¹³ Ido edaun ekokote loka Epuraim, Emudiario da ŋul luitapasete Yuda: Mam Epuraim ikokoteikini Yuda, Yuda da mam itapasi Epuraim.

¹⁴ Ekukusikinos kesi okeper loka Ipilisitian kari nakoto; Imorikikinos aiŋat idwe lukokide. Ikearete akecekanin mama ejaas Edom ka Moab; Erimarete da idwe luka Amon kes,

¹⁵ Emudiari cut EJAKAIT aŋajep naka aŋolol nako Misiri; Ido ilakilakakini akekan neejai Ecor kekekwam loitooni, Inomi ŋes araun icileta ikanykaarei, Isidokari ituŋa kookito akecekejen.

¹⁶ Ejaun erot lokapolon neejai aatoŋot naka iketuŋa luideunos anyoun ko Asuria; Kwape ajaar kanuka Isirael Kapaaran nakenyounio kakwap nako Misiri.