Isaia 10 - Ebaibuli1 Itukwi ŋul luisilakinete ikisila lumam edolito, Ka ikewadikak luiwadikaete nuka aitapaar: 2 Luireŋearete lukican kotube, Luedemarete luebeito lukican lukotuŋaka, Eraunos apuserun nuŋatunakec, Ikokiok da lumejaunakec! 3 Ikwaikinete ai kapaaran naka aiticanio, Kamudiar da naebuni kama elwana? Ikerete da neejai iŋai ayuunio? Ai bo da inyeiniata akusibar? 4 Isudedeete kwap kienan, Ebirokinos kwap kalukearitai. Karaida kiswamata ŋun kere, mam ca ejoniarit akenyunyura, Konye eriŋa akekan erioro. 5 ljo ba Eyasuriat, esuretait loka anyunyuraka, Ebela loka aisiopoka! 6 Ejukakini ŋes asurokin ateker naitisilo, Ecorakini ŋes asurokin ituŋa luka akanyunyura, Aiŋat luŋatuna, ameja da lumelauna, Aipudapuda kes kwape erit loka irotin. 7 Konye mam elosikinit aswam kwaŋin, Eketau da mam eomit kwaŋin; Konye ejai amudiar otauke, Agelar da atekerin kwabo mere nuikidioko. 8 Naarai ebala ebe, “Mam kereka eraas ikapolokoka kere ikabakan? 9 Kalino mam kereka eputosi ka Karakemis? Kamat da mam eputosi ka Arapak? Samaria da mam eputosi ka Damasiko? 10 Kwape adolio akakan ajakanuto nuka aputosia, Nuejaas kaputosia nuegerer nuitelekarito ŋun nuejaas Yerusalem ka Samaria; 11 Kwape keswamakinia Samaria ka aputosiake, Mam kereka eswamakini Yerusalem kwaŋin ka aputosiake?” 12 Kosodi kanen naedaunia rwaru EJAKAIT akeswam kere komoru Sion ka Yerusalem, eticani araito nuka etau loegogoŋ loka ekabaka loka Asuria, ka aiwoŋonut naka akonyeke nueomiara. 13 Naarai atema atiar, “Eswama kagogoŋ naka akakan, ka akaeoa da; Naarai arai loaeobe: Kebelok iikorun luka atekerin, Kaŋat abarakec, Abu kalem kwape emaswa ŋul luibolete koicoloŋo. 14 Adum akakan abar naka atekerin kwape kakais; Ido kwape ituŋanan yenetukonokini abei nuejalitai, Atukokinit eoŋ kwape kwaŋin akwap kere: Emamei yenikibwakibwaki abebenok, Karaida yenikeooŋi aituk, karaida yenikididia.” 15 Edakakini kereka aep aluikin ŋol loejepia? Itopoloor kereka emusemen aluikin ŋol loirii ŋes? Kwape ti eriaria ebela ŋul luikiarete ŋes, Arai kwape ti etonyounia asuretait ŋin yenimam erai akitoi! 16 Kanuka ŋun ŋes ijukunia EJAKAIT, EJAKAIT loka ajoresio, Adokoror mama ejaas ituŋake luketumito; Ido inokokinio aitisisiet kwap kaibusesuke Kwape aitisisiet naka akim. 17 Aica naka Isirael eraun akim, Lokalaunanike da eraun aipeloret naka akim; Icwei isidopori da ikukwake Ka ikodokodoke kapaaran adiopet. 18 Emudiari aibuses naka amagoroke, ka naka imanikoriake luideŋeriaete, Aijar ka akuan da; Ejaun kwape edokororaror lokadekan. 19 Ikidiokoros luedeunos luka ikito luka amagoroke, Epedori ikoku aiwadik kes. 20 Kosodi kanen kapaaran kaŋin, mam bobo aatoŋot naka Isirael, ka ŋul da luideunos luka ekek loka Yakob egoŋakinos kaŋol kaloedanyi kes; konye egoŋakinos ka EJAKAIT, Lokalaunan loka Isirael, kabeit. 21 Eboŋuni aatoŋot, aatoŋot naka Yakob, neejai Edeke Lokapedor. 22 Naarai karaida kesubito ituŋakon Isirael bala asiŋe naka aŋolol, eboŋuni aatoŋot bon: inerunio amudiar, nailapara kadolit. 23 Naarai itodoli EJAKAIT, EJAKAIT loka ajoresio, amudiar nainerunio, kokidiŋ kakwap kere, 24 Aso inera kwanata EJAKAIT, EJAKAIT loka ajoresio ebe, “Wu yes ikatuŋa luibolete koSion, sirikikuriakaros Eyasuriat: karaida kiile yes kebela, ikiari esuretaiteke asurokin yes, kwape ejaar epone loko Misiri. 25 Naarai eriŋa esalit apak edit noi, itodolikinio aisiop ka anyunyuraka kamudiariokec. 26 Isidiki EJAKAIT loka ajoresio edaaset asurokin ŋes, kwape kearit loka Midian lokejai komoru Oreb: ejaun ekebela da kaŋolol, ikiari kwape ejaar epone loko Misiri. 27 Kosodi kanen kapaaran kaŋin, enyouni abwokonike kokeperikon, ajookotoke komurisinikon, emudiario da ajookot kanuka ainyonyoikin akinyet.” 28 Adolu ŋesi Aiat, atubor koMiguron; Kiŋadak abwokonike koMikimas: 29 Atuboros karidat; koperoto Geba: Kitamarana Rama; aker Gibea loka Saul. 30 Kiluluk keporotokon, ijo akoku naka Galim! Kopup ijo Laisa! Koboŋok ŋes, ijo Aŋatot! 31 Aker Madumena; Etukonokinos luibolete koGebim akerit, 32 Toma apaaran na naka lolo eperi Nob: Iniŋi akekan aluikin emoru loka akoku naka Sion, Eukot loka Yerusalem. 33 Koany, ibesi EJAKAIT loka ajoresio atenuna ketasuro: Ejepario lueojak, itisilio luitopolooro. 34 Ejepi kasuat amonieik nuka amagoro, Ibiror Lebanon kanuka lokapedor. |
Ateso Old Version Bible © United Bible Societies, 1961.
Bible Society of Uganda