Isaia 1 - Ebaibuli

¹ Aitapoet naka Isaia okoku loka Amos, nakeanyununei kanuka Yuda ka Yerusalem, kapaarasia nuka Usia, ka Yotam, ka Akas, ka Kesekia, ikabakan luka Yuda.

² Kiira, ijo akuj, kitoik akit, ijo akwap, Naarai ener EJAKAIT ebe: “Abu ketanak ka asa da idwe, Konye kaŋerokis,

³ Ejeni emoŋ papake, Ejeni da asigiria auj naka ejakaitike; Konye mam Isirael ejeni, Mam ikatuŋa eomitos.”

⁴ Wu okwe ateker nakaronon, ltuŋa luelaŋirikinito numam edolito, Aur naka luiswamaete aronis, Idwe luemunaarito! Enyeis EJAKAIT, Amena Ekalaunan loka Isirael, Agitaros, aboŋosi kau.

⁵ Inyo bo ikototor ainomio bobo, Iyatakinotor da aipaliikin? Edek akou kere, iiloro etau kere.

⁶ Anyoun kotau loka akeju aitodol akou, Emamei aŋaleu; Nabarai amusuŋun, ka aionokineta, Ka idola luebosak: Mam ebuleneneo, kwabo mam eenenenoo, Kwabo mam inyonyoanakinio akinyet,

⁷ Eswap akusikwap; ecwei ikusireria kakim; Akwapukus da enyamete imo kakonyenekus, Ido eswap, naarai epikosi ŋes imo.

⁸ Ido asal akoku naka Sion Kwape keidukuru loejai amana naka emusabibu, Kwape kaiteis naejai amana, naka akolil, Kwape ka ere loirigaunito lukasurup.

⁹ Kedim EJAKAIT loka ajoresio Aitasalikin oni aatoŋot naedit noi, Tikirai kwape ka Sodom, Tikiiput kwape ka Gomora.

¹⁰ Kiirasi akirot naka EJAKAIT, Yes ijaka lukoSodom; Kitoikis akit ikisila luka Edekewok, Yes ituŋa lukoGomora.

¹¹ Inera EJAKAIT ebe: “Anyoin ajokis naka asubanakus nuipu kamakaŋ? Kaidoto ainakineta nuicweio nuka imerekekin lumaseniko, Ka asiepai naka ibaren luipisio; Kwabo mam alelakinit aokot nuka itoba, Karaida nuka idwe luka amerekekin, karaida nuka ikorwa.

¹² “Naitakanuniata kakonyeneka, Iŋai bo kiburai aipudapud akalaroi?

¹³ Siriyauŋunete bobo asuban nuka aamameak; Etalei eoŋ lukisupurununo. Elap lokelamunan ka asabato, anyara da atukosia, Mam acamunit, eraas numam edolito, Eebo, atukonokin da nakalaunan.

¹⁴ Elait ekatau ilapiokus lukelamunak ka ipucinokus luicorakinitai; Eraas aitapasitoi kaneajai; Kapas atitiŋonokin kes.

¹⁵ Ido nailoianariata akusikanin Ebwaenenei akakonye kama ijaas; Eebo, nailipenenata nuipu, mam eiranari: Imodimoda akusikanin aokot,

¹⁶ Kilota, kitalaunos; Kolemasi aronis naka aswamisiokus kakonyeneka; Kinyeis aswam aronis.

¹⁷ Kisisiautu aswam ejok, komoenenete etube; Koyuuŋunete yenereitai, Kirabanakinete ikokiok, Kopuronokinete apuserut.”

¹⁸ Inera EJAKAIT ebe: “Kopotu ca do, kenerutu: Karaida kereŋak adiakanaretakus be, Ekwaŋuunete kwape kakile; Karaida kireremata kwape kaokot, Iliacaunete kwape ka epaaba.

¹⁹ Arai iraas luinupaka ka luirimaka, Inyamenenete ajokis naka akwap.

²⁰ Konye do kiŋeroto kipaliikis, Kidanyio kekileŋ: Naarai ener aituk naka EJAKAIT,”

²¹ Aluor ca ma ere lomunot lodote! Ŋol loeleleba kolo etube! Kiboie kolo adolit kotomake, Konye kwana ikaarak.

²² Aluor epuesakon elele, Inyalakinitai ebinokon kakipi.

²³ Epaliikis ikapolokokon, Eraas ipadic luka ikokolak. Emina ŋolituŋanan ainakineta nuitumudakete akonye, Irii da ainakineta. Mam Isigalikinete ikokiok, Mam da etube loka apuserut edolokini kes.

²⁴ Kanuka ŋun inera EJAKAIT, EJAKAIT loka ajoresio, Lokagogoŋon loka Isirael ebe: “Bu, eyeŋuni do kama ejaas luketokokolito, Ido enyaŋi kama ejaas lukasurupoka.

²⁵ Ido ebelokini akakan mamakon, Aliliauni elelekon cut, Alemari da luinyalakina tomakon kere.

²⁶ Enyakakini ikatubokokon kwape sek, Ikenerunakakon da kwape kageunet, Kokau kinyarao Ere loka adolit, Ere lomunot.”

²⁷ Elakuni etube Sion, Adolit da ŋul lukotomake luibelokinos.

²⁸ Konye emudiaros ikcbueanarak ka ikadiakanarak nepepe, Isidoporio cut ŋul luejalete EJAKAIT.

²⁹ Naarai kirumete yes ileic kanuka iluan lukiŋobeleete, Edakaros akwesikus kanuka imanikoria Iukiseunete,

³⁰ Naarai iraunos kwape elua loeoni akekiot, Ido kwape emanikor loemameete akip.

³¹ Eraun lokagogoŋ kwape esilot loka amujajut, Akeswam da kwape aatwenyitwenyit; Icweikinio kes kere, Komamei yenitudeŋi.