Isabulin 99 - Ebaibuli

¹ Eyait EJAKAIT, komaranete ituŋa; Iboie kama kikerubin; kijaŋijaŋa akwap.

² Epol EJAKAIT kotoma Sion; Ejai kuju noi aitelekarit iruna kere,

³ Kituroto kesi ekonikiror loepol lokanosibib; Lokalaunan ŋesi!

⁴ Emina agogoŋ naka ekabaka da etube; Iticasi ijo abeit; Itubi kabeit kadolit kotoma Yakob.

⁵ Kitopoloosi yesi EJAKAIT Ewokodeke, Ido komaata koicoloŋoke: Lokalaunan ŋesi!

⁶ Musa ka Aaron kotoma osasedotinike, Ka Samuel da kotomakec kaluiworoete ekekiror; Apotu kiworoto EJAKAIT Koboŋok ŋesi kes.

⁷ Kiner kakes kopir loka edou: Apotu koricata aiteienunetake, Ka ekisil loabu koinak kes,

⁸ Wu EJAKAIT Ekosideke, ibu Koboŋok kes; Ŋo Edeke loibu kisioni kes, Karaida kinyanenenei nuka aswamisiokec.

⁹ Kitopoloosi yesi EJAKAIT Ewokodeke, Komaata da koukotoke lokalaunan; Naarai EJAKAIT Ewokodeke erai Lokalaunan.