Isabulin 97 - Ebaibuli

¹ Eyait EJAKAIT; kolel akwap; Kiyalamikinos apuiana nuipu.

² Irimorito ŋes idouon ka amuton: Adolit ka etube kes apetetait naka eicoloŋoke.

³ Iŋarenikinit akim ŋes, Icwei lukasurupoke luirimorito.

⁴ Abu eimiliake kinwak akwap: Koany akwap, komaran.

⁵ Kocalaros iukon bala edipor kakonyen nuka EJAKAIT, Kakonyen nuka EJAKAIT loka akwap kere.

⁶ Elimori aku; akedolit, Aanyut da ituŋa kere akeibuses.

⁷ Kirumata ileic kere luijaanakinete aputosia nuikee, Lueoloboboto kanuka aputosia: Komaata ŋes, yes idekesio kere.

⁸ Abu Sion kiira kiyalamikin, Kolelata da adwe nuka Yuda; Kanuka itubesiakon, wu EJAKAIT.

⁹ Naarai ijo, EJAKAIT, ijai kuju noi icelelei kakwap kere: Kitopolooritai noi aitelekarit idekesio kere.

¹⁰ Aso ca, yes luiminasi EJAKAIT, kolaata aronis: Idari ŋesi itauon luka lukalaunakake; Eyuuni kes kakan naka ikaronon.

¹¹ Eniuni aica kanuka ikadolitok, Aiyalama da kanuka luitenara kotauon.

¹² Kiyalamikinos kotoma EJAKAIT, yes ikadolitok; Kimalata ekekiror lokalaunan.