Isabulin 96 - Ebaibuli

¹ Koyeikisi EJAKAIT ekosio lokitetet: Koyeikisi EJAKAIT, yes akwapin kere.

² Koyeikisi EJAKAIT, kiturito ekekiror: Kitodiasi akeitaiar ŋinipaaran.

³ Kolimosi akeibuses katekerin, Aswamisioke nukaumokin kotuna kere.

⁴ Naarai epol EJAKAIT, loibusakinit noi aiturio: Loibusakinit ayonio adepar idekesio kere.

⁵ Naarai idekesio kere luka iruna eraas aputosia: Konye EJAKAIT ŋes asubi akui,

⁶ Aibuses ka apolou ejaas akonyeneke: Agogoŋ ka atemelel ejaas aiboisike nakalaunan.

⁷ Koinakis EJAKAIT, yes atekerin nuka ituŋa, Koinakis EJAKAIT aibuses ka agogoŋ,

⁸ Koinakis EJAKAIT aibuses naibusakinit ekekiror: Koyautu ainakinet, kolomut alaroike.

⁹ Komaata EJAKAIT konapito luelaete: Komaran kakonyeneke akwap kere.

¹⁰ Kolimosi katekerin ebe, “Irumit EJAKAIT: Icasit akwap da, komam epedori aijaŋijaŋa: Etubokini Iruna kabeit.”

¹¹ Kiyalamikin akuj, kolel akwap; Kirurum aŋolol, ka ailelebake kere.

¹² Kole! ekitui, ka luejaas toma kere; Kosodetc do ikito kere luka amagoro ayoore kanuka aiyalama;

¹³ Kakonyen nuka EJAKAIT, naarai ebunit; Naarai ebunit atubokin akwap: Etubokini akwap kadolit, Ka ituŋa da kakebeit.