Isabulin 95 - Ebaibuli

¹ Kopotu, kayeikis EJAKAIT: Kekareete kaiyalama mama ejai Atiiba naka aitaiariowok.

² Kekunyakis akonyeneke kaimal, Kekareete mamake kaiyalama kisabulin.

³ Naarai EJAKAIT ŋes Edeke Lopeti, Ekabaka da lopeti, adepar idekesio kere.

⁴ Agururin nuka akwapin ejaas roma akanike, Aidiasia da nuka ironan eraas nuken.

⁵ Aŋololin nuken, ŋes kolo kesubi: Akekanin elunulunete akwap naconit.

⁶ Kopotu, kamaata kakukumo; Kakukonokinos kakonyen nuka EJAKAIT Ekasubaniwok.

⁷ Naarai ŋes Ewokodeke, Oni da kirai ituŋa lukoronyike; Amerekekin nuka akanike. Lolo, arai kiirasi ekeporoto!

⁸ Sirikitininikata ikusitauon, kwape koMeriba, Kwape kapaaran naka Masa kamodiŋ:

⁹ Nakakoduniata eoŋ lukapapaakus, Ketogogonoto, koanyut akaswam.

¹⁰ Ikar akaisaoŋon apotu lukatur kaya ketakadikis; Kabala ebe, “Kes iruna luapuoros kotauonokee, Komam ejenete ikarotin.”

¹¹ Ŋes keyapoikinio’ kakaisiop ebe, Mam elomunete rwaru aibworareteka.