Isabulin 9 - Ebaibuli

Loka Ekapolokiton lueruos; aruo naka Mut-laben. Esabuli loka Daudi

¹ Emalaenenei EJAKAIT kekatau kere; Etodianari aswamisiokon kere nukaumokin.

² Eyalamanakin, alakanar kotomakon; Ayeenenei aiturit ekonikiror, wu Jo Loijai kuju kakuj.

³ Naeboŋoriata lukasurupoka kau, Iguikinos, emudiaros kakonyenekon.

⁴ Naarai ibu ijo kitodolo akabeit ka akiroka; Ibu kiboikin oicoloŋ aitub kadolit.

⁵ Ibu kitoron atekerin, komudia ikaronok, Komwata ikiroriakec ikar kere.

⁶ Adaunos lukasurupo, asilikis ikar kere; Ireria da lukiweliweli, Amudiar aiitunetekec mudic.

⁷ Konye iboienenei EJAKAIT erai ekabaka ikar kere: Etemonoki eicoloŋoke atubokinia.

⁸ Etubokini akwapisinei kere kadolit, Einakini ituŋa etube kotoma abeit.

⁹ Eraun EJAKAIT aŋopis naka luereitai, Eebo, aŋopis kapakio nuka ationis:

¹⁰ ŋul da luejenete ekonikiror kimunonenos; Naarai ijo, EJAKAIT, mam ijalakinit ŋul lukimoete.

¹¹ Koyeoto aiturit EJAKAIT, loiboie koSion; Kolimonokis ituŋa akeswamisinei.

¹² Naarai ŋol loiburai aokot iituni kes: Mam imurwokini aimony naka lukibakor.

¹³ Kitimoi, wu EJAKAIT; Koany aiticanitoika naketaanyut lukalaito, Ijo lokitonyouni eoŋ korutei luka atwanare;

¹⁴ Tetere etodiari aituriokon kere: Korutei luka akoku naka Sion, Ebwoŋenena kotoma aitajarakon,

¹⁵ Ebirokinos atekerin toma aipany nakebokete: Epok akecekeju kikulepek kotoma atacit nakelokete.

¹⁶ Etejenun EJAKAIT elopet, adau etube: Epok yenikaronon kotoma aswam naka akaninike kilopet. Sela.

¹⁷ Eboŋorete ikaronok Okatwak, Kes atekerin kere nuemurwokis Edeke.

¹⁸ Naarai mam luilwaritos imurwokinio apaarasia kere, Karaida amun naka luitasonos mam eoliori ikar kere.

¹⁹ Konyou, wu EJAKAIT, kinyek ituŋanan aipikor: Kotubokinai atekerin kakonyenekon.

²⁰ Kitukurian kes, wu EJAKAIT: Kojenut atekerin ebe eraas ituŋa atai! Sela.