Isabulin 89 - Ebaibuli

Masikil loka Etan Eserakit,

¹ Ayei nuka aitim naka EJAKAIT ikar kere: Itejenuni da akaituk amunonutukon mama ejaas aturio kere,

² Naarai atema atiar, “Edukio aitim ikar kere: Itieasi ijo akonimunonut kotoma akuj cut.

³ Etutuk kaloseunaka, Eyapoik Daudi ekabulesit;

⁴ Eticasi aurikon ikar kere, Aduki eicolonokon loka ajakanut mama ejaas aturio kere.” Sela.

⁵ Wu EJAKAIT, ituri akui nukaumokinikon, Akonimunonut da katukot naka lukalaunak,

⁶ Naarai iŋai bo EJAKAIT kitirianere jo kotoma akuj? Iŋai da kodwe luka idekesio iputotor ijo?

⁷ Edeke loinosibib noi kainerunet naka lukalaunak, Loibus ayoŋit adepar ŋul kere luirimorito ŋes,

⁸ Wu EJAKAIT Edeke loka ajoresio, Iŋai bo lokapedor kwape kajo, wu Edeke? Akonimunonut da kirimorit jo,

⁹ Iyait ijo ewono loka aŋolol; Naedakunotor akailan nukotoma, isililinl ijo kes,

¹⁰ Ibilibil ijo Rakab kwape yenearitai; Isiarisiar lukasurupokon kakan nakagogonukon.

¹¹ Erai akuj nakon, ka akwap da erai nakon; Akwap ka ailelebake, ijo kisubuni kes.

¹² Ŋo ŋes isubi ari naka agolitome ka ari naka eŋalakimak: Iyalamas Tabor ka Kerumon kokirorikon.

¹³ Ejai jo akaa naka apedor: Erai akanikon nakagogon, ikiara akanikon nakoteten,

¹⁴ Adolit ka etube kes apeteta nuka eicolonokon, Aitim ka abeit kes kinarenikinito jo,

¹⁵ Isirerenitoi ituŋa lueienete aruo naka arupepe: Wu EJAKAIT, elosenenete kotoma aka naka akonyenekon.

¹⁶ Isiyalamikinito ekonikiror apaaran kere: Itopoloorio da kes kadolitekon,

¹⁷ Naarai ijo aibuses naka agogonukec: Kotoma asianutukon ŋes itopoloorere amumwaratakosi.

¹⁸ Naarai ebukuwok ŋes loka EJAKAIT; Ekabakawok da ŋes loka Lokalaunan loka Isirael

¹⁹ Ibu kolo kiner kalukalaunakaken kaitapoet, Kotema atiar, “Ebwaik aiŋarakinio neejai ŋol loegogon; Etopoloo da ediopet loeseunitai kotuna,

²⁰ Aseu Daudi ekabulesit; Enyonyoik ŋes akakinyet nakalaunan:

²¹ Iticasenenei akakan; Akakan da itogogoni ŋes.

²² Mam lokasurup eŋasi ŋes; Karaida okoku loka aronis aitican ŋes.

²³ Esibirori eoŋ lukasurupoke kakonycneke; Adanyi da luelaito ŋes.

²⁴ Konye akamunonut ka akaitim eiaununos nepepe kaŋes; Kokirorika itopoloorere akemumwarat

²⁵ Ebwaikini akekan aŋolol, Akekan da nakoteten ebwaikini oeorin.

²⁶ Emonyenenei mamaka ebe, ‘Irai ijo papaka, Ekadeke, atiiba da naka aitajarioka.’

²⁷ Etarauni da ŋes ekakiyai, Ido loitelekarit ikabakan kere luka akwap,

²⁸ Edarenenei akaitim kanukeŋ ikar kere, Akaitutuket da icasi cut kamaken

²⁹ Mam etanaŋi akeur ikar kere, Ka ekeicoloŋ loka ajakanut kwape kepaarasia nuka akuj.

³⁰ Arai keiala ikedwe ckakisil, Komam etupito itubesiaka;

³¹ Arai kebila ikakisila, Komam ericete akaicorakineta;

³² Ŋes do etieania eoŋ aibucaretakec kebela, Numam adolitekec da kamaeareta.

³³ Konye mam erikari eut aitimika kamaken, Karaida aiŋoŋar akamunonut.

³⁴ Mam abili akaitutuket, Karaida aiiulakin akirot naadau alomun kaitukuka.

³⁵ Eyapo adiopekirot kalauniteka; Mam eŋalai Daudi;

³⁶ Eiaenena aurike ikar kere, Ekeicoloŋ da loka ajakanut kwape kakoloŋ kama ajai.

³⁷ Iticasio ikar kere kwape kelap, Ido kwape kekajenan lomunot kotoma akuj.” Sela.

³⁸ Konye ieakar ijo isac da, Inyunyurik lokinyonyoikitonokon akinyet,

³⁹ Ila aitutuket naka ebulesitikon: Itisil da akeboko acakakin kwap.

⁴⁰ Ibelebel ijo iregiake kere; Itiyatiya da ikereria.

⁴¹ Luitorete orot kere enaŋete ŋes: Araun ŋesi amorosit koidunyetake.

⁴² Itopoloo ijo akan nakoteten naka lukekoloke; Isiyalamik da lukasurupoke kere.

⁴³ Eebo, itiŋiŋ ijo akwanis naka ekilenike; Mam ibu kitobwo ŋes kojie,

⁴⁴ Itanaŋ apiripirike, Icakak eicoloŋoke loka ajakanut kwap.

⁴⁵ Ituurian apaarasia nuka atumunike; Iburia da ŋes kileic. Sela.

⁴⁶ Wu EJAKAIT, itodoli ai inopit ikar kere? Itodoli ai akoninyunyura enoki bala akim?

⁴⁷ Okwe kutu kwape eurianar apakika; Aamameak anyoika kisubia kolo idwe kere luka ituŋa!

⁴⁸ Iŋai bo ituŋanan yencian yenimam eanyuni atwanare, Yeneyuuni akeijar kapedor naka Okatwak? Sela.

⁴⁹ EJAKAIT, ai bo abeata aitimesiakon nulem? N uibu kiyapok Daudi kamunonutukon.

⁵⁰ EJAKAIT, kiitu amorosit naka ibulcsinikon; Kwape adakitor katorobuka amorosit naka ituŋa kere lukagogoŋok;

⁵¹ Nakemoromoroto lukasurupokon, wu EJAKAIT, Nakemoromoroto ikukut luka lokinyonyoikitonokon akinyet.

⁵² Kituritete ETAKAIT ikar kere. Amen, Amen.