Isabulin 82 - Ebaibuli

Esabuli loka Asap,

¹ Ebwoi Edeke katukot naka Edeke; Imbi kokidin kidekesio.

² “Itodolete yesi ai irabete komam itupito abeit, Ido itubusikinito ikaronok? Sela,

³ Kirabakisi lukican ka ikokiok: Kirabakisi da kabeit luereitai ka lukibakor.

⁴ Kolakutu lukican ka luilwaritos: Koyuutu kes kakan naka ikaronok.”

⁵ Mam ejenete, mam eomoomoete; Irimete kesi taai kotoma amuton, Apeteta kere nuka akwap eianaros.

⁶ Katema atiar, “Iraas yesi idekesio, Yes kere iraas odwe luka Loejai kuiu kakuj.

⁷ Karaida kwaŋin itwakete yesi kwape kituna, Ibiroros da kwape kediopet kotoma ikapolok.”

⁸ Konyou, wu Edeke, kotubok akwap: Naarai irumit ijo atekerin kere.