Isabulin 77 - Ebaibuli

Loka Ekapolokiton lueruos; kwape ejaar epone laka Yedutun. Esabuli laka Asap.

¹ Amonyi kekaporoto mama ejai Edeke; Ebwololoi kekaporoto mama ejai Edeke, Ŋesi da kapupuni.

² Toma apaaran naka icanika abu kamo EJAKAIT: Korioro akakan kuare komam itegi; Kogir ekatau aitalakario.

³ Eitunit Edeke, keyalononi: Kanuriani, emwokolikin ekamoyo.

⁴ Isikoler akakonye: Mam apedori ener da naarai eticanitoi noi.

⁵ Aomoom apaarasia nukolo kasonya: Ikar da lukolono sek.

⁶ Eitunit ekakosio loka akuare: Aomoom kotauka bon; Ekamoyo da ekukunyikina amoote.

⁷ Ecakari kereka Edeke ikar kere? Mam bobo ŋes itoduni aminake?

⁸ Asaŋa cut akeitim ikar kere? Atwania akeisumunet ikar ka ikar?

⁹ Emurwoki Edeke araut lokasianut? Etasana da ŋesi akeitimesia kotoma anyunyura? Sela.

¹⁰ Katema ebe, “Na ŋes akailworuna; Konye eituni ikar luka akan nakoteten naka Loejai kuju kakuj.” Sela.

¹¹ Alimonori aswamisio nuka EJAKAIT; Naarai eituni nukaumokinikon nukolono.

¹² Aomoomoenenei da aswamisiokon kere, Ido enyogonokini aomoom nuisubenenei.

¹³ Wu Edeke, ekonirot ejai toma aibois nakalaunan. Iŋai bo edeke loepol kwape Edeke?

¹⁴ Irai ijo Edeke loiswamai nukaumokin: Itejenu ijo akonigogoŋ kotuna,

¹⁵ Ilaku ijo ikonituŋa kakonikan, Odwe luka Yakob ka Yosep. Sela.

¹⁶ Apotu akip koanyut jo, wu Edeke; Apotu akip koanyut jo, koyonata, Komaranata da ataroi.

¹⁷ Apotu idouon kobukut akipi, Kijuk akuj eires: Kisiarakinos da imaliakon.

¹⁸ Eporoto loka airetunikon abu kojai toma otapipirio Eimilia da kitacau akwap: Komaran akwap kijaŋijaŋa.

¹⁹ Kojai erotokon toma aŋolol, Ka isokonokon da toma akipi nuipu, Konye mam ajenio ikonikukut.

²⁰ Ibu kinarenikinite ikonituŋa kwape kesipan loka amerekekin, Kakan naka Musa ka Aaron,