Isabulin 76 - Ebaibuli

Loka Ekapolokiton lueruos; koraman lukaputio, Esabuli laka Asap. Ekosio.

¹ Ejen Edeke kotoma Yuda: Epol ekekiror kotoma Isirael.

² Ejai ekewema lokalaunan toma Salem, Toma Sion da iboieneno.

³ Ŋina abilia ŋesi ikojoi luka akabwa; Ebuku, ka ekileŋ, ka ejie. Sela.

⁴ Irai ijo lokaibuses, Loitelekarit ironan lumam edaunos.

⁵ Anatar lueninik itauon, ajototo akecejo; Emamei da loieasit kotuna Iukagogonok.

⁶ Wu Edeke loka Yakob, itoroni ijo, Kosodete aio nuka atwanare aikamar agali ka ebalasi.

⁷ Ŋo, ijo loisogim, ibus koyoni: Iŋai bo da epedori abwa kakonyenekon nainyurtyurikinor ijo?

⁸ Abu ekonitube kopupun anyoun kokuju; Kokurianar akwap, kopalaa,

⁹ Naanyounio Edeke aitub, Aitajar luitasonos kere lukotoma akwap. Sela.

¹⁰ Abeit kiruri jo anyunyura naka irunanan: Inapi da anyunyura naesalakinit,

¹¹ Kiyapo, kitodolik neejai EJAKAIT Ekonideke: Luelukunito ŋes kere koyaut ainakineta Mama ejai ŋol loibus ayonio.

¹² Emudiari ŋesi imoyon luka ikapolok: Erai losogim kama ejaas ikabakan luka akwap.