Isabulin 74 - Ebaibuli

Masikil loka Asap,

¹ Wu Edeke, kanukinyo kicakaria ijo sic ikar kere? Kanukinyo epurionokinia anyunyurakon amerekekin nukoronyikon?

² Kiitu ekodetekon, lokolo ibu ijo kogwel, Loibu ijo kolaku araun ateker nakairumetekon; Ka emoru Sion lokiboieneno ijo,

³ Kodakak akonikeje amejei numam edaunos, Nukaronok kere nueswamaki lokasurup aibois nakalaunan,

⁴ Ikunasi lukasurupokon kokidin katukotokon; Ebwaikis imederanakee araun aanyuneta.

⁵ Kosubito bala ituŋa luapotu kikeut aepeikec Ajepia amoni naka ikito,

⁶ Aswamisio nuigirir kere Ajepa kesi kaepei ka anyulia,

⁷ Eeweikis akoniibois nakalaunan; Etisilioto aibois naiboieneno ekonikiror atiyakis kwap.

⁸ Apotu kotemasi kotauonokee ebe, “Katiyatiyata kes cut”: Eeweanakis da atukosia kere nuka Edeke kotoma akwap.

⁹ Mam kianyuni aanyunetawok: Emamei bobo enabi edio da; Kwabo emamei kamawok idio yenejeni ebe itodoli ai.

¹⁰ Wu Edeke, itodoli lokasurup ai emoromoroi? Einyanakini kereka da lokasurup ekonikiror ikar kere?

¹¹ Kanukinyo inyakaria ijo akonikan, akonikan nakoteten? Kolem ŋes katorobukon komudia kes,

¹² Konye Edeke ŋes Ekabakaka apeŋo, Loiswamai aitajar kokidin kakwap.

¹³ Ibu kotiak aŋolol kanuka akonigogoŋ: Idecideci akwes nuka apiuan kakipi.

¹⁴ Idecideci akwes nuka Lebiatan, Iinak ŋes araun inyamat luka ituŋa luiboienenete kamodiŋ,

¹⁵ Ibu kocil atan ka akalele da: Kitoonik icorin luepolok noi.

¹⁶ Apaaran erai nakon, akuare da nakon: Ibu kitemok aica ka akoloŋ da.

¹⁷ Ibu kibwaik iikoruno kere luka akwap: Ibu kiswama akamu ka aiporo da.

¹⁸ Kiitu na, wu EJAKAIT, ebe amoromor lokasurup, Ituŋa da lubaniok ainyanakis ekonikiror.

¹⁹ Sirikiinak aijar naka ajelekon mama ejai etiaŋ loka ais: Sirikiimurwok aijar naka lukieanakon ikar kere.

²⁰ Koricite aitutuket: Naarai aiboisio nuemutoko nuka akwap ileleba itogoi luka akaje.

²¹ Okwe kinyeis luereitai aboŋun ileicikinito: Kituroto lukican ka luilwaritos ekonikiror.

²² Konyou, wu Edeke: kopurokin bon, Kiitu kwape kimoromoroo jo ituŋanan yeniban apaaran kere.

²³ Sirikiimurwok eporoto loka lukasurupokon: Edokununei tiritir eeelet loka ŋul kalukisurokinito joo