Isabulin 71 - Ebaibuli

¹ Wu EJAKAIT, ebwaik akamuno tomakon: Sirikerumata bobo ileje.

² Koyuunai, kitajarai kadolitekon: Kitoik akonikit mamaka, kitajarai,

³ Koraun ijo kamaka atiiba naeboionono, Naalosenenei dueudue: Icorak ijo aitajar eoŋ; Naarai ijo ŋes akatiiba ido akabwas da.

⁴ Koyuunai, wu Ekadeke, kakan naka ikaronon, Kakan da naka yenemamei adolit ka yenemeŋerana.

⁵ Naarai ijo akamuno, wu EJAKAIT Edeke: Ŋo amunoka ageun koiditeuka.

⁶ Ageun naajaar akoik naka totoka jo kigagat eoŋ: Ŋo ŋol lokitolomuni eoŋ kakoik naka totoka: Keturenenei jo tiritir.

⁷ Arai eoŋ aumokinet kaneeja luipu; Konye irai ijo akaŋopis nakagogon.

⁸ Ilelebun akaituk aituriokon, Ka aibusesukon apaaran kere,

⁹ Sirikiirenea kapak nakamoionuka; Sirikiiial nakinonoor akagogoŋ.

¹⁰ Naarai lukasurupoka ineras nukan; Ka ŋul da lueperunete ekatau inerununete nepepe,

¹¹ Kobalas ebe, “Ajal Edeke ŋes: Korukioto kikamut ŋes; Naarai emamei yeneyuuni.”

¹² Wu Edeke, sirilwanikina kamakaŋ; Wu Ekadeke, korurukun aiŋarakin eoŋ.

¹³ Kileicikis kodaunos da lueraas lukasurup luka ekarau; Korapiasi kes amorosito ka aitisilio Luemoete aisirieb eoŋ.

¹⁴ Konye eoŋ amunonena tiritir; Eyatakini noi aiturit joo

¹⁵ Elimori akaituk adolitekon, Ka aitajarakon apaaran kere; Naarai mam ajeni etiaikec.

¹⁶ Abuni kaswamisio nuka apedor naka EJAKAIT Edeke: Alimonori nuka adolitekon nupekon bon.

¹⁷ Wu Edeke, kisisianak ijo eoŋ ameun keiditeuka; Aitodol kwana da alimo akoniswamisio nukaumokin.

¹⁸ Eebo, karaida kamoion koja da akorwo, Wu Edeke, sirikiijal; Aitodol nealimoro akonigogoŋ Mama ejai aturi naetupakini, Akonipedor da mama ejai yenebuni kere.

¹⁹ Akonidolite da, wu Edeke, ikiara noi. Ŋo loiswama nuepolok, Wu Edeke, iŋai bo iriakatar jo?

²⁰ Ŋo, lokitodik sio ican luipu luetioko; Kitajari sio bobo, Kitodokuni sio kaidules naka akwap.

²¹ Kiyatak jo akapolou, Ido kibelokin bobo kitalaka eoŋ.

²² Keturi da jo kibore kayenikutat, Abeitekon da, wu Ekadeke: Ayeikinenei aiturit jo kadeudeu, Wu jo Lokalaunan loka Isirael.

²³ Iyalamikin noi akaituk naayeikinio aiturit jo; Ka ekatau da loibu kolaku.

²⁴ Inerenenei da akaŋajep adolitekon Apaaran kere: Naarai eleicikis, adakaros da akecekwes, Luemoete aisirieb eoŋ.