Isabulin 46 - Ebaibuli

Loka Ekapolokiton lueruos; Esabuli loka odwe luka Kora; aruo naka Alamot, Ekosio.

¹ Edeke ŋes neekerianarawok, ka agogoŋuwok, Ekeŋarakinan lokirurukit noi kotoma ocan.

² Ŋes mam kikuriakaror, karaida kijulakin akwap, Karaida keukonoros iroŋan kidiŋ aŋololin:

³ Karaida kirurumata akip kiluŋuluŋanaros, Karaida kemaranata iroŋan kanuka adakununukec, Sela.

⁴ Ejai nen ecor, italakarete iciletake ere loka Edeke, Aibois nakalaunan naka iweman luka ŋol loejai kuju kakuj.

⁵ Ejai Edeke kidinike; mam eukun: Iŋarakini Edeke ŋes tupuruc sek,

⁶ Erurumata atekerin, aukonoros ajakanuto; Kelimo ekeporoto, kocalar akwap.

⁷ Ejai EJAKAIT loka ajoresio kaoni; Edeke loka Yakob ŋes neekerianarawok. Sela.

⁸ Kopotu, koanyut aswamisio nuka EJAKAIT, Nukaumokin nueswamaki akwap.

⁹ Itasaŋi ijiisio kiton osaŋe loka akwap; Ebili akabwa, etubutubei akwaras; Icwei agalin kakim.

¹⁰ Kopalasi, kojenut ebe Eoŋ Edeke: Ketopoloonorio katekerin, Ketopoloonorio kakwap.

¹¹ Ejai EJAKAIT loka ajoresio kaoni; Edeke loka Yakob ŋes neekerianarawok. Sela.