Isabulin 45 - Ebaibuli

Loka Ehapolokiton lueruos; aruo naka Apecelun; Esabuli loka odwe luka Kora. Masikil. Ekosio loka Amin,

¹ Ilapanar akirot naejok kotauka; Enera akiro nuapeleu nuka ekabaka: Aŋajepeka ŋes ekalamu loka ekewadikan loekapakina.

² Itemelel ijo aitelekarit idwe luka ituŋa; Ebukokinitai asianut aitukukon: ŋes kisirereŋio Edeke jo ikar kere.

³ Koenik ekonikileŋ otul, ijo ekagogoŋon, Koen akoniibuses ka apoloukon.

⁴ Kibwanen kapoloukon kipiko, Kanuka abeit ka aitasono ka adolit: Akonikan da nakoteten kisisianakini jo akiro nusogim.

⁵ Eitak ikonikojoi: Ibironoros ituŋa kakonyenekon; Ejaas ikonikojoi otauon luka lukasurupo luka ekabaka.

⁶ Ejaenena ekoniicoloŋ loka ajakanut ikar kere, wu Edeke: Ebela lokadolit ŋes ebela laka ajakanutukon.

⁷ Imina adolit, ilait aronis: Tape Edeke, Ekonideke, kinyonyoikini jo Akinyet naka aiyalama aitelekarit lucekon.

⁸ Eurok ikoninapen kere sa luesaete, icicikwa, ka ekasia; Kisiyalamikinito jo iraman luka aputio Kotoma otogoi luka ekabaka luka ikel luka etom.

⁹ Ejaas adwe nuka ikabakan toma aŋorokon nukaibuses: Ebwoi akabaka kakanikon nakoteten enapit esabu loka Opir.

¹⁰ Kiira, ijo apese, koomoom, kitoik akitikon: Kimurwokis ituŋakon, ka ekal laka papakon.

¹¹ Ŋes do imielakinor ekabaka akonitemelel: Naarai ŋes ekonijakait; komaenenei ŋes.

¹² Ebuni da apese naka Turo kainakinet; Iŋaiŋaete lukabarak kotuŋa akonimin.

¹³ Erai akoku naka ekabaka naibus kotoma ore loka ekabaka: Esonyitai inapeneke kesabu.

¹⁴ Eyaŋaunio mama ejai ekabaka enapit lueculuculo: Eyaŋaunio neijai ijo Abekon nukaupake nuetupitos.

¹⁵ Eyaŋaunio kaiyalama ka ailel: Elomarete togo loka ekabaka.

¹⁶ Aibois naka lukapapakon ejaunos ikonidwe, Luituluori ijaka kakwap kere.

¹⁷ Esiitununei aturio kere ekonikiror; ŋes kimalaeneneata jo ituŋa ikar kere.