Isabulin 41 - Ebaibuli

Loka Ekapolokiton lueruos. Esabuli loka Daudi.

¹ Isirerenitoi ŋin yeniitunit yenikican: Eyuuni EJAKAIT ŋes kapaaran naka aronis,

² Idarenenei EJAKAIT ŋes tetere ebusi, Ido isirereŋitoi kakwap; Sirikiinak ŋes mama ejaas lukasurupoke aiswamakin nuipudas.

³ Igaŋi EJAKAIT ŋes ilworuna koitada: Itemonokini ijo cut akeperit kedekakin.

⁴ Katema atiar, “Wu EJAKAIT, kitimoi: Kitaŋaleu ekatau; naarai adiaka kamakon.”

⁵ Ineras lukasurupoka nueroko mamaka ebe, “Wori bo etwania, koolio ekekiror?”

⁶ Naebunio ediopet aanyun eoŋ, inera aamameak; Etuki eketau numam edolito: Itatami da ŋun ilato.

⁷ Iyeiyeas lukalaito kere nepepe: Inerunete aiswamakin eoŋ aronis.

⁸ Ebalas ebe, “Adoiki adek nakaronon: Kwape do eperio mam bobo enyouni.”

⁹ Eebo, epadicaka loabu kamuno, loanyamenenei akatap, Ketonyoiki aketitibat,

¹⁰ Konye jo, wu EJAKAIT, kitimoi, kitonyounoi, Tetere enyaŋari.

¹¹ Ŋes ajenunia ebe kisiyalamikinit eoŋ, Naarai mam Iokasurupika kepikorit.

¹² Kigaŋit ijo eoŋ kotoma adoliteka, Kibwaikinit da akonyenekon apaarasia kere.

¹³ Kituritete EJAKAIT, Edeke loka Isirael, Ageun apeŋo aitodol ikar kere, Amen ka Amen.