Isabulin 32 - Ebaibuli

Esabuli loka Daudi. Masikil.

¹ Isirerenitoi ŋin yenisionio adiakarike, Yenerapitai da akeronis.

² Isirerenitoi ituŋanan yenimam imarakini EJAKAIT numam adolit, Yenimam emodit komoyoke.

³ Nakeliliŋia, komojoŋata akakojo Kanuka aumenoka aitiwar akwap.

⁴ Naarai kalaŋirikinit akonikan paaran ka kuare: Koonikis akakip bala aonit naka akamu. Sela.

⁵ Abu kalimok jo akaronis, Komam ebwait numam adoliteka: Kabala ebe, “Alimori adiakaretaka mama ejai EJAKAIT.” Sela. Ibu kisioni numam adolit nuka akaronis.

⁶ Kanuka ŋun kilipenenei jo ŋinituŋanan yeneyoŋit Edeke kapak naitakanunia: Abeit naeleleata akip nuipu mam edolokinete ŋes.

⁷ ljoŋ anopisika; kiiyari ijo eoŋ kocan; Kirigauni eoŋ kikososinei luka alakunio. Sela.

⁸ Ketuutonori jo, kesisianakini da korot loiloseneneo: Kekwenyari jo kakakoŋu,

⁹ Sirisubito bala ibalasin, arai bala inyubun, luemamei ajenun: Luibusakinit ajen kasua ka amunyin aitikokinia kes, Kinyeis aikunyakin mama ijai,

¹⁰ Ejaunos ikaronok ican luipu; Konye yenemuno EJAKAIT irigauni ŋin aitim.

¹¹ Kiyalamikinos kotoma EJAKAIT, kolelata yesi ikadolitok: Kibwoŋata kanuka aiyalama, yes kere luitenara itauon,