Isabulin 26 - Ebaibuli

Esabuli loka Daudi.

¹ Kotubokinai, wu EJAKAIT, naarai abu kalosenenei kotoma abeiteka: Abu da kamunoneno EJAKAIT komam ajurusiar.

² Koŋicai, wu EJAKAIT, kiniŋoi; Kitem ikaŋeretenya ka ekatau da.

³ Naarai ejai akonisianut-nakamin kakonyeka; Abu kalosenenei da kotoma abeitekon.

⁴ Mam abu keboienenei kituŋa luutai; Mam da kiupakin kaluijoseoko.

⁵ Alait eoŋ atukot naka lukeswamak nueroko, Mam da kiboikin kalukaronok.

⁶ Elosenenei akakanin kotoma amamut karonis; Kwaŋin kasodi airimor ekonitem, wu EJAKAIT:

⁷ Tetere esiirari eporoto loka aimal, Alimori da akoniswamisio kere nukaumokin.

⁸ Wu EJAKAIT, amina aibois naka etogokon, Ka aibois naiboieneno aibusesukon.

⁹ Sirikimoria ekatau nepepe kikadiakarak, Karaida akaijar nepepe kikaarak:

¹⁰ Toma akaninikec ejai ameŋeranut, Akanikec nakoteten ileleba ainakineta nuitumudakete akonye.

¹¹ Konye eoŋ alosenenei kabeiteka: Kolakunai, kitimoi.

¹² Ebwoi akakeju kaibois naiiyakina: Eturenenei EJAKAIT kotoma okodeta.