Isabulin 22 - Ebaibuli

Loka Ekapolokiton lueruos; aruo naka Amiam naka Acila kide. Esabuli loka Daudi.

¹ Wu Ekadeke, Ekadeke, kanukinyo kijalakinia? Kanukinyo ilwaniaror aiŋarakin eoŋ, kakiro nuka aumenoka?

² Wu Ekadeke, eworoi paaran, konye mam iboŋokini; Kuare da mam eliliŋi.

³ Konye irai ijo lokalaunan, Ijo loiboie kotoma aiturit naka Isirael.

⁴ Kimunonenos jo lukapapaakos: Kimunonenos, ibu koyuununei kes.

⁵ Kiworoenenete jo, koyuununete: Kimunonenos jo komam irumenenete ileic.

⁶ Konye eoŋ arai iritanit, kwabo mam arai ituŋanan;’ Imoromorot ka imenitono da yenika ituŋa.

⁷ Kakienatatar lukaanyunete kere, kesekelete: Isuanaros, imuŋumuŋete akwes, kineras ebe,

⁸ “Koluŋakin neejai EJAKAIT; tetere eyuuni ŋes; Tetere eyuuni ŋes, naarai elelakinit ŋes!”

⁹ Konye ijo ŋol lokisidouni eoŋ kakoik naka totoka: Lokisumunoori da aroko anaki.

¹⁰ Aponi ketitiŋi jo ameuni kaurunioka: ljoŋ Ekadeke ameuni kakoik naka totoka.

¹¹ Sirikilwaniar kaneajai; naarai eapie aronis; Naarai emamei yenikeŋarakini.

¹² Kerimorito imaseniko luipu; Kerigaunito imaseniko lukagogoŋ luka Basan.

¹³ Kaooŋanakinete aitukekec, Kwape eŋatuny loikuna loegat.

¹⁴ Kabukor kwape kakipi, Elionyonokinos akakojo da kere: Esubit ekatau bala edipor; Acalar kokidiŋ amoetenaka.

¹⁵ Aono akagogoŋ bala atibolok; Emakakin akaŋajep abokonyaka, Kiyau da toma apua naka atwanare.

¹⁶ Naarai kerimorito inokwo: Karidakinit atukot naka lukeswamak aroŋis; Kecumata akakanin ka akakejen,

¹⁷ Apedori aimarun akakojo kere; Kasesenete kedetakinito akonye:

¹⁸ Akorokorata akanapito, Kilamilamata eroet kanuka ekasoka.

¹⁹ Konye sirikilwaniar, wu EJAKAIT! Uo ekakeŋarakinan, kiwonyuni aiŋarakin eoŋ.

²⁰ Koyu ekatau kokileŋ; Iminataka kapedor naka ekiŋok.

²¹ Kitajarai kotoma aituk naka eŋatuny; Eebo, ibu Koboŋok da kamumwar nuka ekosobwan.

²² Alimonokinenei ekonikiror mama ejaas iinacanaka: Keturenenei jo kokidiŋ katukot,

²³ Kiturito ŋes, yes Iuiyoŋito EJAKAIT! Kitopoloonorete ŋes, yes kere aur naka Yakob; Koyoŋenenete ŋes, yes kere aur naka Isirael.

²⁴ Naarai mam abu komen kwabo mam abu kola Ican luka ŋol kaloiticanio; Kwabo mam abu kibwa akekonyen kamakeŋ; Konye naeworoo, abu kiira,

²⁵ Mamakon ŋes elomunia aituriteka kotoma okodet loepol: Etodoli akaiyaposio kakonyen nuka ŋul kalueyoŋito ŋes.

²⁶ Enyamete luitasonos kimonikinos: Iturete EJAKAIT ŋul luemootos ŋes. Kojarenenete ikusitauon ikar kere.

²⁷ Iitunete rwaru awaitin kere nuka akwap, kibelokinos neejai EJAKAIT: Emai ajena kere naka atekerin kakonyenekon.

²⁸ Naarai ajakanut erai naka EJAKAIT: ŋes da irumit atekerin,

²⁹ Ituŋa luiusak kere enyamete emaete da: ŋul da Iueboŋorete toma apua ekukumete kakonyeneke, Ŋopeŋol lomam epedori aitajar eketau.

³⁰ Uaanakini aur ŋes: Elimokinio nuka EJAKAIT aitodol atur naejauni.

³¹ Epote elimonokinete adoliteke Mama ejaas ituŋa lumoolo eurio, ebe eswama ŋin.