Isabulin 16 - Ebaibuli

Mikitam loka Daudi.

¹ Kidarai, wu Edeke; naarai kamuno jo

² Atema eoŋ EJAKAIT atiar, “ljoŋo EJAKAITika: Emamei eoŋ ajokis dimarai mamakon.”

³ Lukalaunak luejaas kakwap, Eraas kesi luejok noi, tomakec ŋes ejai akaiyalama kere.

⁴ Itupuo ican luka ŋul kaluisiecarete EJAKAIT itia edeke ece, Mam ainakini asubanakec numatan nuka aokot, Kwabo mam alimuni ikecekiroria kakaituk.

⁵ EJAKAIT ŋes akorakinet naka akairumet ka naka akakoli da; Idari ijo ŋun nukabeikinete.

⁶ Kebirokinos eoŋ aunoi kaiboisio nuketalakarak; Eeca, ejai bo eoŋ airumet naejok.

⁷ Emalai EJAKAIT, loabu kenerak eoŋ; Eeca, kesisianakinete iŋeretenyaka kosawan luka akuare,

⁸ Etilinenenei EJAKAIT tiritir; Naarai ejai iŋesi akanika nakoteten, mam eriaŋiriaŋenena.

⁹ Ŋes iyalamar ekatau, ibwoŋar da akaibuses: ŋes iboieneneo akakuan inapakina,

¹⁰ Naarai mam inyeini ekatau kOkatwak; Kwabo mam icamakini ikalaunanikon aibos.

¹¹ Kitodianakini eoŋ erot loka aijar: Neijai ijo ŋes aiyalama naitekoro; Akanikon nakoteten ŋes ejaas nuitalakarito ikar kere.