Isabulin 132 - Ebaibuli

Ekosio loka Adokanar.

¹ EJAKAIT, kiitu Daudi Aicanioke kere;

² Kwape eyapoikinio EJAKAIT, Kiyapoik da Lokapedor loka Yakob ebe:

³ “Abeit mam alomari owema loka ekatogo, Karaida alosit aperitika;

⁴ Mam acamakini akonyeka ajo, Karaida abukioka ailuranar;

⁵ Aitodol naadumakinia EJAKAIT aibois, Ewema lokalaunan loka Lokapedor loka Yakob.”

⁶ Koany, kipou keirasi nuke kotoma Epurata; Kadumakisi da ŋes amana naka amonieik.

⁷ Kilomari owemanake lukalaunak; Kimai ŋes kokwap keicoloŋ loka akejeke.

⁸ Konyou, wu EJAKAIT, koloma aiboisikon nakiyeŋunet; ljo, ka asaduku naka agogoŋukon,

⁹ Konapata isasedotinikon adolit; Kikareoto lukalaunakakon kanuka aiyalama.

¹⁰ Kanuka Daudi ekonibulesit, Sirikibelok akonyen nuka lokinyonyoikitonokon akinyet.

¹¹ Eyapoiki EJAKAIT Daudi kotoma abeit; Mam ijulakini: Ebe, “Kaur naka akuanakon esiboikini oicoloŋokon,

¹² Arai kerica ikonidwe aitutuketeka Ka aitejenunetaka nuesisianakini kes, Iboikinos do ikecedwe da oicoloŋokon ikar kere.”

¹³ Naarai aseu EJAKAIT Sion; Ekilakin aitaraun akeibois.

¹⁴ Na ŋes aibois nakiyenisika ikar kere: Nee ŋes neeboikin eoŋ; naarai ekilakin ŋes.

¹⁵ Esirereŋi cut inyamatake: Esimonikini lukicanike katap.

¹⁶ Etanapi isasedotinike aitajario: Lukalaunakake da ikareete kanuka aiyalama.

¹⁷ Esilibuni kaŋina amumwarat naka Daudi: Etemok atala kanuka lokinyonyoikitonoka akinyet.

¹⁸ Etanapi lukasurupoke ileici Konye emwekimweki abokoke kamakeŋ,