Isabulin 10 - Ebaibuli

¹ Kanukinyo ibwasitor, wu EJAKAIT? Kanukinyo iŋopenenaa kapakio nuka ationis?

² Idopeo yenikican kotoma aiwoŋonut naka ikaronok; Kikamunai kes kobotei lukebilete.

³ Naarai ituro ikaronon kanuka aiŋobel nakotauke, Yenikebit da eŋerit, eebo, elait ŋesi EJAKAIT,

⁴ Ebala ikaronon kotoma aiwoŋonutuke ebe, “Mam itepeseni.” Ebalas akeomisio kere ebe, “Emamei Edeke.”

⁵ Eninik ikerotin apaarasia kere; Itubesiakon iyedara kuju noi kakonyeneke: Ido imuanari lukasurupoke kere,

⁶ Ebala kotauke ebe, “Mam eriaŋiriaŋa; Mam aanyuni ican aitodol aturio kere.”

⁷ Ileleba aitukuke elamit ka aimod ka areit; Kwap kaŋajepeke ejai ameŋeranut ka numam adolit.

⁸ Iboikin aiboisio nuperunet koronyia: Eari yenemamei aronis kaiboisio nuka aiyeiyea. Imwarakinit yenikalany akekonyen.

⁹ Eŋopi kaperunet kwape keŋatuny kotoma abuake: Idasi aikamun yenikican; Ikamuni yenikican, ibwosuni koboike.

¹⁰ Ekukumi, elolot, Ibirorete ikekagogoŋok lukalanyak.

¹¹ Ebala kotauke ebe, “Emurwoki Edeke: Ebwa akekonyen; mam eanyununei.”

¹² Konyou, wu EJAKAIT; Wu Edeke, kodak akonikan: Sirikiimurwok yenikibakor.

¹³ Kanukinyo emenitor ikaronon Edeke, Atemar kotauke ebe, “Mam itepeseni”?

¹⁴ Ibu koany; naarai iseseni ameŋeranut ka aidupor, aibwaikin akanikon: Eluŋakina ikalany mama ijail: Ibu koraun ekeŋarakinan loka ikokiok.

¹⁵ Kobil akan naka ikaronon: Ituŋanan yenikaronis da, komo ijo akeronis aitodol neemamuunor.

¹⁶ EJAKAIT ŋes Ekabaka loka ikar kere: Amudiaros atekerin kotoma akwapuke.

¹⁷ EJAKAIT, ibu kiira eipud loka luitasonos: Itemonokini itauonokec, isiirari akonikit:

¹⁸ Airabakin ikokiok ka luemwaŋitai, Kinyek ituŋanan yenelomuni kalup ajaut kanuitukurianete.