Iromayon 7 - Ebaibuli

¹ Iinacan, mam kereka ijenete-naarai enera kaŋul kaluejenete ikisila ebe eyaito ikisila etuŋanan eroko ejari?

² Naarai eenito ikisila aberu naemanyitai eroko okilenike ejari; konye ketwana ekiliokit, eosikinitai ŋin kokisila luka okilenike.

³ Kanuka ŋun enyarao naadote arai kedumun kecekiliokit, apak naeriŋar okilenike ejari. Konye arai ketwana okilenike, eosikinitai anyoun kokisila, mam da erai naadote arai kemany ekiliokit ece.

⁴ Ikainacan, yes da kwape kwaŋin ipotu kotwakata kama kikisila, kanuka akuan naka Kristo, tetere iraunos luka ece, ŋes ŋol loitajarunitai kokatwak, tetere kidumakini Edeke araito.

⁵ Naarai nakiraar kolo luka akuan, abu airaŋaanut naka adiakar kiswama kotoma atutubetawok kanuka ikisila, kasodete adumakin atwanare araito.

⁶ Konye kwana kiwosikinitai anyoun kokisila, kitwaka kama ejai ŋin nakijoreorit, kasodete kejaanakis komoyo lokitetet kwabo mere kaiwadikaet namojoŋ.

⁷ Aso do kinera anu? Eraas kereka ikisila adiakar? Madi akuj! Konye timam kajenu adiakar kedim ikisila. Naarai timam kajenu aiŋobel kedim ikisila atemar ebe, “Siriŋobelei.”

⁸ Konye adiakar, naabu kodum apak kanuka aicorakinet, kiswama kotomakaŋ ŋolipone loka aiŋobel, Naarai etwanit adiakar emameete ikisila.

⁹ Abu eoŋ karai kolo loajari komameete ikisila, konye nakebunio aicorakinet kojaru adiakar, katwana do eoŋ.

¹⁰ Kerai aicorakinet naeyauni aijar kosubite ŋin kamakaŋ naeyauni atwanare.

¹¹ Naarai abu adiakar, naabu kodum apak kanuka aicorakinet, keŋala eoŋ, kaaria da.

¹² Kwaŋin eraas ikisila lukalaunak, ka aicorakinet da nakalaunan, ka naedolit ka naejok da.

¹³ Aso do koraun kereka ajokis atwanare kamakaŋ? Madi akuj! Konye adiakar, tetere etakanuni araut adiakar, abu kiswama atwanare kotomakaŋ kanuka ajokis, tetere iyatakin adiakar araut adiakar naerono noi kanuka aicorakinet,

¹⁴ Naarai kijeni ebe eraas ikisila luka emoyo; konye eoŋ arai lokakuan, kagwelaritai ayait naka adiakar.

¹⁵ Naarai mam ajeni nueswamai, Naarai nuakoto, mere kes nueswamai, konye eswamai nualait.

¹⁶ Konye arai eswamai numam akoto, acamunit ebe ejokuka ikisila.

¹⁷ Aso kwana mere eoŋ eswamai ŋun dimarai adiakar naiboie kotomakaŋ,

¹⁸ Naarai ajeni ebe emamei ibore yenejok yeniboie kotomakaŋ, ŋes atemar ebe toma akuanaka. Naarai ejai akote diekaŋ, konye aswam ajokis be.

¹⁹ Naarai mam eswamai ajokis naakoto, konye aronis namam akoto, ŋes eswamai.

²⁰ Konye arai eswamai numam akoto, mam bobo eoŋ eswamai dimarai adiakar naiboie kotomakaŋ.

²¹ Kwaŋin adumuni ekisil ebe naakotor eoŋ aswam nuejok, kaapikin aronis.

²² Naarai alelakinit ikisila luka Edeke kotoma otuŋanan lokotoma,

²³ Konye aanyuni ekisil ece kotoma atutubetaka ejiosi kekisil loka aomisioka, ka aituluor eŋatara loka ekisil loka adiakar loejai toma atutubetaka.

²⁴ Itukwi eoŋ lokican! Iŋai bo kayuuni eoŋ kakuan kana nakatwanare?

²⁵ Emalai Edeke kanuka Yesu Kristo Ejakaitiwok! Aso do eoŋ elopet ejaanakini ekisil loka Edeke kaomisioka, kwabo ekisil loka adiakar kakuanaka.