Iromayon 2 - Ebaibuli

¹ Aso emamei jo aiyar, ijo ituŋanan yenitubokini yenice; naarai ŋun nuitubokini yenice, itubokin ilopet aitelekar, naarai jo yenitubi, iswamai da ŋupeŋun,

² Kijeni oni ebe aitub naka Edeke erai nakabeit mama ejaas ŋul luiswamaete nuikote nen.

³ Ijo ituŋanan, yenitubokini luiswamaete nuikote nen, iswamai ijo da ŋupeŋun, iwomit ebe ikui tope kaitub naka Edeke?

⁴ Imwaŋit kereka ijo abar naka ajokisike, ka aŋirikin, ka atitiŋikinitike da? Mam kereka ijeni ebe ajokis naka Edeke kiriuni jo aitoronikin?

⁵ Konye kanuka aninikukon, ka etaukon loemamei aitoronikin, iŋadakin bon anyunyura kapaaran naka anyunyura ka apukorio naka etube loedolit loka Edeke,

⁶ loetacakini ŋinituŋanan kwape ejaatar aswamisioke;

⁷ mama ejaas ŋul luemoete aibuses ka ayoŋio, ka aibut, kotoma atitiŋ naka aswamisio nuejok einakini aijar naka ikar kere.

⁸ Ido kaŋul kalueŋolopaka, luiulakinito abeit, luerimasi amamus adolit, edumunete anyunyura ka adedeŋ.

⁹ Ejaunete ican ka aridakinio toma aijar naka ŋinituŋanan yeniswamai nueroko, aisiaun lyudayat, ka Iyonanit da,

¹⁰ konye aibuses ka ayoŋio ka ainapakin mama ejai ŋinituŋanan yeniswamai nuejok, aisiaun Iyudayat, ka Iyonanit da.

¹¹ Naarai emamei aitiak ituŋa kama ejai Edeke.

¹² Naarai lukediakarete kere komameete ikisila, emudiaros da komameete ikisila, ŋul da kere lukediakarete kojaas kikisila, etubokinio kokisila.

¹³ Naarai mere ŋul luiirarete ikisila kes eraas ikadolitok kakonyen nuka Edeke, konye ikeswamak ikisila kes luitojokio araut ikadolitok.

¹⁴ Naarai naiswamaata Imo luemameete ikisila koinono loka ikisila, karaida emameete ikisila eraas kesi ikulepek ikisila.

¹⁵ Itodikinete ebe iwadikatai aswam naka ikisila toma otauonokec itejenikini da etaukec, iwosaete akeceomisio nuepegasi bonik ka bonik, arai bo eiyaros;

¹⁶ kapaaran naetubokinia Edeke nukaiyeiyea nuka ituŋa kama ka Yesu Kristo kwape ejaatar Akiro Nukajokak nuketitiŋitai eoŋ.

¹⁷ Konye jo, arai kinyaritai Eyudayat kogoŋakina okisila, iwoloboboi kama ejai Edeke,

¹⁸ kojeni nuekoto ŋesi, icamuni da nuitelekarito ajokis, kituutooritai kotoma okisila,

¹⁹ itogogoŋit bon araut ekeŋarenon loka imudukiok, aica da naka ŋul kaluejaas amuton,

²⁰ eketetenan loka ibaŋiok, ekesisianakinan loka imukerun, ijai kaput naka aijen ka abeit toma okisila,

²¹ aso jo loisisianakini loce, mam tope isisianakini bon? Jo loilimonokini ebe Sirikokoi, ikokoi kereka ijo?

²² Jo loibala ebe Siridote, idotei ijo? Jo loisacit aputosia, iŋasi ijo abilai?

²³ Jo loiwolobobot kotoma okisila, itisili kereka Edeke kanuka apaar kokisila?

²⁴ Naarai kwape iwadikatere ebe, “Einyanakinio ekiror loka Edeke katekerin kanukus.”

²⁵ Naarai ejai akepio ajokis arai iswamai ikisila; konye arai irai ijo loipaarit kokisila, arau akonikepio amamus akepio.

²⁶ Aso arai erici lomam ekepep aicorakineta nuka ikisila, mam kereka amamus akepioke imarakinio araut akepio?

²⁷ Ŋol da lomam ekepitai koinono loerici ikisila, mam kereka kitubokini jo loijaas kaiwadikaet ka akepio da, loipaari kokisila?

²⁸ Naarai ŋol loerai Eyudayat kokuju mere ŋol Eyudayat cut, karaida akepio nakokuju toma akuan;

²⁹ dimarai ŋol loerai Eyudayat kotoma, ka akepio nakotau kotoma omoyo kwabo mere aiwadikaet. Akeiturio mam ebuni kotuŋa dimarai kama ejai Edeke.