Iromayon 10 - Ebaibuli

¹ Ikainacan, nuemiela kotauka, ido nuelipi Edeke kanukec ŋes aitajariokec.

² Naarai etejenuni kanukec ebe edunyaka kanuka Edeke, konye mere kotoma aijen,

³ Naarai kanumam ejeniata adolit naka Edeke, kokotos aitogogoŋ adolitekec kikulepek, mam apotu korimasi adolit naka Edeke.

⁴ Naarai Kristo ŋes aŋetakinet naka ikisila, tetere ŋin yeniyuuni itojokio araut ikadoliton.

⁵ Naarai abu Musa kiwadik ebe ituŋanan yeniswamai adolit naelomuni kokisila ejari kotoma ŋin.

⁶ Konye adolit naelomuni kaiyuun inera kwanata ebe, Sirikiner kotaukon ebe, “Iŋai bo yenekot adokari toma akuj?” (Ŋes atemar ebe, ayaun Kristo kwap.)

⁷ Arai bo ebe, “Iŋai bo yenekot aijesar toma aipany?” (Ŋes atemar ebe, ayaun Kristo kuju anyoun kokatwak.)

⁸ Konye inera anu? Ebe, Eapie akirot kamakon, kaitukukon, kotaukon da, (ŋes atemar ebe akirot naka aiyuun nakilimonokini isio).

⁹ Naarai arai ilimori kaitukukon ebe Yesu ŋes Ejakait, iyuuni da kotaukon ebe abu Edeke kitajar ŋes kokatwak, kitajario.

¹⁰ Naarai iyuuni ituŋanan kotauke kiton adumun adolit, elimori da kaitukuke kiton adumun aitajario,

¹¹ Naarai ineras nuiwadikatai ebe, “Ŋin yeniyuuni ŋes mam irumete ileic.”

¹² Naarai emamei atiaketait, Eyudayat ka Eyonanit; naarai erai ŋesi Ejakait loka kere, ekabaran mama ejaas kere luiwoneete ŋes.

¹³ Naarai “Ŋin yeniwonei ekiror loka Ejakait itajario.”

¹⁴ Aso iwoneete biai ŋol lomam iyuunito? Ido da iyuunete biai ŋol lomam iirarito? Iirarete da biai komamei ekalimonokinan?

¹⁵ Elimonokinete biai komam iyakiaritai? Kwape iwadikatere ebe, “Ejokuka cama akeje nuka ŋul kaluelimonokinete Akiro Nukajokak!”

¹⁶ Konye mam kes kere apotu korimasi akiro nukajokak. Naarai inera Isaia ebe, “Ejakait, iŋai bo iyuunit akiro nueirarit kamakosi?”

¹⁷ Aso aiyuun elomuni kotoma aiirar, aiirar da kanuka akirot naka Kristo.

¹⁸ Konye abala eoŋ ebe, mam kereka apotu kiirasi? Eebo, eirasi; “Anata ekeceporoto akwap kere, Akecekiro da kiton osaŋeta luka akwapin.”

¹⁹ Konye abala eoŋ ebe, mam kereka luka Isirael ajenunito? Nugeet inera Musa ebe, “Kesurumi yes ekokote kama kaŋul lumam eraas ateker; Ketunyunyurikini do yes kanuka ateker naemamei aijen.”

²⁰ Isaia da etitiŋ noi einer ebe, “Abu kadumun kama kaŋul lumam kamooto; Abu ketejenun mama kaŋul lumam keŋisito.”

²¹ Konye nuka Isirael ebala ebe, “Abu kariorite akakanin aitiwar akwap mama ejaas ituŋa lukepali ka luirebirebete.”