Ipilipin 3 - Ebaibuli

¹ Nuesalito, ikainacan, kiyalamas kotoma Ejakait. Mam ketapasi eoŋ aiwadikakin yes ŋupeŋun, konye kiticasete yes.

² Kocoito iŋokwo, kocoito ikeswamak nueroko, kocoito luegeras.

³ Naarai kirai oni luka akepio nakabeit, lukimai kOmoyo loka Edeke, lukiwolobobot kotoma Kristo Yesu, ido lumam kimunokina akuan.

⁴ Karaida kapedori eoŋ amunokina akuan. Arai eomit etuŋanan ece kere amunokina akuan eoŋ etelekarit:

⁵ aponi kakepi kapaaran nakikanyetekauni, loka ajena naka Isirael, loka ateker naka Benyamin, Eburaniat obe loka Iburanian; kakiro nuka ikisila, Eparisayot,

⁶ kakiro nuka adunyanut, kareite ekanisa, kakiro nuka adolit naejai toma okisila, mam abu kajai kaitoronet.

⁷ Konye kere nukeraas ameda kamakaŋ, abu kaomit atwaniar kanuka Kristo.

⁸ Konye abu kaomite cut iboro kere araut atwaniar kanuka ajokis naepol noi naka ajenun Kristo Yesu Ejakaitika, Abu katwania iboro kere kanukeŋ, kaomite da araut acin, tetere adumuni Kristo,

⁹ kasodi adumunio kotomakeŋ, komamei adoliteka, naebuni kotoma okisila, dimarai ŋin naebuni kanuka aiyuun Kristo, adolit naebuni kama ejai Edeke kotoma aiyuun,

¹⁰ tetere ajenuni ŋes, ka apedor naka ajarunike, ka aimor kaŋes arieboke, ketuputoritere katwanareke,

¹¹ tetere arai apedori, adolokini ajarun nakokatwak,

¹² Mere ebe adau adumun karaida aitodolikinio; konye ebwapit tetere ekamuni, naarai kekamunit Kristo Yesu eoŋ.

¹³ Iinacan, mam aomit ebe adau aikamun, konye eswamai adiopekirot, kemurwokinete nukokau, kewopei nuejaas kiŋaren,

¹⁴ ebwapit adolore neepegare, neejai ainakinet naka anyarit nakokuju naka Edeke toma Kristo Yesu.

¹⁵ Aso oni kere lukipoloor, kaomitos ŋun; ido arai iwomitos yesi nuegelara, kipukokini da Edeke yes ŋin.

¹⁶ Konye ca nukidoloki, kalosenenete kaŋun,

¹⁷ Iinacan, koputorito eoŋ nepepe, ido kosesenete ŋul luelosete kwape ejaar yes aanyunet kamakosi.

¹⁸ Naarai elosete luipu, luabu kalimonok yes irwan ipu, kwana da kalimokini kamonyi, ebe kes lukasurupo luka emusalaba loka Kristo,

¹⁹ Esaŋekec ŋes amudiar, edekekec ŋes akoik, aibusesukec da ejai toma oleic, eomitos nuka akwap.

²⁰ Naarai obuwok ejai toma akuj, ŋina da kidareo Eketaiaran, Ejakait Yesu Kristo,

²¹ loilocokini awatewok nuesilok, aputoor akekuan nakaibuses, kwape ejaar aswam naka akepedor aitononokikin iboro kere kwapukeŋ.